Nur-Sultanda mektep jármeńkesi 28 tamyzǵa deıin jalǵasady

NUR-SULTAN. QazAqparat - «Demalys Promenade» aýmaǵynda mektep taýarlarynyń jármeńkesi ótip jatyr. Keńse taýarlaryn, kıim-keshek, aıaq kıim jáne kerek-jaraqtardy naryq qunynan tómen baǵamen jergilikti kásipkerler, sondaı-aq qazaqstandyq tigin jáne aıaq kıim fabrıkalary usyndy, dep habarlaıdy QazAqparat ákimdiktiń resmı saıtyna silteme jasap.

Jármeńke 28 tamyzǵa deıin jalǵasady jáne 10:00-den 19:00-ge deıin ótedi.

«Jármeńke qala ortalyǵynda uıymdastyryldy. Kúndelikti jumysymyzǵa baılanysty bazarǵa barý ońaı emes. Munda baǵalar aıtarlyqtaı tómen. Balalarymyzǵa qajetti zattar satyp aldyq. Dápteri, qalamy, sómkesi - qajettiniń bárin tabýǵa bolady. Otbasylyq bıýdjetimizge salmaq túspedi», - dedi elorda turǵyny Aıjan Muratova.

«Jármeńkege 18 kásipker qatysyp jatyr, olardyń 6-y – aıaq kıim men kıim óndiredi. Saýda oryndary tegin beriledi. Jalǵyz shart – kásipker baǵany naryq baǵasynan tómen belgileýi tıis. Sonymen qatar, balalar men ata-analarǵa arnap shyǵarmashylyq ujymdardyń uıymdastyrýymen kún saıyn kontserttik baǵdarlamalar qarastyrylǵan», – deıdi sharany uıymdastyrýshylar.

Jármeńkege kásipkerlerden bólek, úkimettik emes uıymdar da jumyldyryldy.

Máselen, psıhologııalyq súıemeldeý qyzmetiniń jáne «Quqyq» QQ mamandary zań, psıhologııalyq jáne áleýmettik máseleler boıynsha tegin konsýltatsııalar ótkizedi.

Aıta keteıik, jármeńke «Mektepke jol» respýblıkalyq qaıyrymdylyq aktsııasy aıasynda ótip jatyr.

Foto: gov.kz