Nur-Sultanda masaǵa qarsy dezınsektsııalyq jumystar júrip jatyr
«15 sáýirden bastap taıaz sý aıdyndaryn óńdeýge kiristik. 21 sáýir men 14 mamyr aralyǵynda alǵashqy óńdeý kezeńin júrgizdik. Munda tutas qala aýmaǵy qamtyldy. Árıne, nóser jaýyn men jel jumysty tıimdi júrgizýge kedergi keltirdi. Jumystyń ekinshi kezeńin 16 mamyrda bastadyq», - dedi «Astanalyq dezınfektsııa» JShS dırektorynyń orynbasary Bekbolat Talǵarbekov QazAqparat tilshisine bergen suhbatynda.
Qazirgi ýaqytta qalanyń tórt aýdanynda kishigirim sý aıdyndarynda jáne qaraýsyz qalǵan jertólelerde dezınsektsııalyq jumystar jalǵasýda. Alaıda qolaısyz aýa raıynan jumys kestesi úzilip jatyr.
«Óńdeýdiń ekinshi kezeńi bastaldy. Aýa raıynan baılanysty jumysty óz ýaqytynda bastaı almadyq, sebebi preparat shaıylyp ketýi múmkin. Al kúshtirek preparatty turǵyndardyń qaýipsizdigi úshin qoldana almaımyz. Dárileý jumystary ortalyq astanalyq saıabaqtan bastalady», - dedi ol.
Qala aýmaǵynda «Astanalyq dezınfektsııa» kompanııasynyń 150 dezınfektory jumys istep jatyr. 8 bıolog ár aýdandy baqylaýda ustaıdy. Odan bólek, 10 arnaıy kólik preparat pen sý tasýǵa kómektesedi, 2 dezınfektsııalyq mashına men 20 teromgenerator bar.
Sonymen birge, B. Talǵarbekov dezınsektsııalyq jumystardyń qaı ýaqytta júrgiziletinin aıtty.
«Sý aıdyndaryn tańǵy saǵat 5-ten bastap aýa raıy 25 gradýsqa deıin qyzǵansha óńdeýge tyrysamyz. 25 gradýstan keıin barlyq jumys toqtaıdy, sebebi preparattar 25 gradýstan joǵary temperatýrada býǵa aınalyp, kúshin joıady. Qala ishinde keshki ýaqytta jumys isteýge tyrysamyz. Saıabaqtar ashylǵan soń adam sanyna qaraı 21:00-23:00 aralyǵynda jumys isteımiz», - dedi Bekbolat Talǵarbekov.