Nur-Sultanda mas júrgizýshi jol tazalap júrgen «KAMAZ» kóligin soqty
NUR-SULTAN. QazAqparat – Saǵat 04.05-te VAZ-21099 kóliginiń júrgizýshisi Ál-Farabı kóshesiniń boıymen ketip bara jatyp, jol tehnıkasyna soǵylǵan.
Oqıǵa ornyna kelgen polıtseıler júrgizýshiniń mas bolǵanyn baıqaǵan, dep habarlaıdy QazAqparat elordalyq polıtsııa departamentiniń baspasóz qyzmetine silteme jasap.
Sondaı-aq, qujattaryn tekserý kezinde 30 jastaǵy júrgizýshiniń 2018 jyly mas kúıde kólik tizgindegeni úshin júrgizýshi kýáliginen aıyrylǵany belgili boldy.
Alaıda, oǵan qaramastan júrgizýshi taǵy mas kúıde rýlge otyrǵan. Atalǵan fakti boıynsha ol polıtsııa basqarmasyna jetkizilip, kóligi kommýnaldyq turaqqa qoıyldy.
Oǵan qatysty QR QK 346-baby boıynsha tergeý júrip jatyr.
Polıtsııadan málim etkendeı, 2020 jyldyń qańtarynan bastap mas kúıde júrgizýshi kýáliginsiz kólik tizgindegenderge jaza qatańdaǵanyn eske saldy.
«Jyl basynan beri Nur-Sultanda kólik júrgizý quqyǵynan aıyrylǵan 40 azamat mas kúıde avtokólik júrgizgeni úshin qylmystyq jaýapqa tartyldy. Ótken jyly QR QK 346-baby boıynsha 45 júrgizýshi qylmystyq jaýapqa tartylǵan bolatyn», - dedi polıtsııa vedomstvosynyń basshysy Erjan Sádenov.
