Nur-Sultanda mas júrgizýshi polıtseılerden eki ret qashyp ketýge árekettendi
NUR-SULTAN. QazAqparat – Elordada saǵat 09:00 shamasynda Uly Dala kóshesindegi patrýldik polıtsııa qyzmetkerleri «Lada» avtokóliginiń júrgizýshisi baǵdarshamnyń qyzyl túsine shyǵyp, jaıaý júrginshige jol bermegenin baıqap qalǵan.
Avtopatrýl ekıpajynyń toqta degen talabyn elemeı, jol tártibin buzýshy jyldamdyqqa basyp, jasyrynýǵa tyrysqan, dep habarlaıdy QazAqparat Nur-Sultan qalalyq polıtsııa departamentiniń baspasóz qyzmetine silteme jasap.
Birneshe kósheden ótkesin, ol turǵyn úı kesheniniń aýlasynda kóligin qaldyrǵan da, qasha jónelgen. Polıtseıler qashqyn qorshaýdan qarǵymaq bolǵan kezde qýyp jetken. Alaıda ol qorshaýda otyrǵan kúıi polıtseılerdi óziniń aıtqanyna kóndirmek bolǵan. Degenmen qýǵyn munymen aıaqtalǵan joq. Júrgizýshini tómen túsirip, kólikke apara jatqan kezde ol polıtseılerden bosap shyǵyp, qasha jónelgen. Jaıaý qýý kezinde polıtsııa qyzmetkerleri mas júrgizýshini tez ustady.
Mas bolǵan júrgizýshige medıtsınalyq tekserýden ótý usynyldy, biraq ol bas tartty.
Osylaısha, júrgizýshi QR ÁQBK 613-babynyń 4-bóligin buzǵan, ıaǵnı polıtsııa qyzmetkeriniń mas kúıin kýálandyrýdy ótý týraly zańdy talabyn oryndamaǵan.
Ákimshilik sot sheshimimen 27 jastaǵy júrgizýshi 15 táýlikke ýaqytsha ustaý ızolıatoryna qamaldy jáne 8 jyl merzimge kólik quralyn basqarý quqyǵynan aıyryldy. Avtokólik kommýnaldyq turaqqa qoıyldy.
