Nur-Sultanda mas kúıde kólik aıdaǵan áıel júrgizýshi kýáliginen aıyryldy
NUR-SULTAN. QazAqparat – Tún ishinde «102» nómirine qala tirshiligine beı-jaı qaramaıtyn azamattar habarlasyp, mas kúıdegi qyz túngi bardan shyǵyp, «Toıota» markaly avtokóliktiń róline otyrǵanyn aıtqan, dep habarlaıdy QazAqparat Nur-Sultan qalalyq Polıtsııa departamentiniń baspasóz qyzmetine silteme jasap.
34 jastaǵy avtokólik júrgizýshisin polıtseıler Ýálıhanov-Imanov kósheleriniń qıylysynda ustady. Áıeldiń áreketi aqylǵa qonymsyz edi, ol polıtsııa qyzmetkerlerin kórip, daýystap jylaı bastaǵan. Biraq avtokólik tizgindegen áıeldiń áreketi polıtseılerdiń aıaýshylyq sezimin oıata almady. Olar medıtsınalyq kýálandyrýdan ótýdi usynǵan.
Medıtsınalyq kýálandyrýǵa sáıkes, júrgizýshi kólikti jeńil dárejedegi mas kúıde aıdaǵan.
Avojúrgizýshige qatysty QR ÁQBtK 608-baby 1-tarmaǵy boıynsha ákimshilik is qozǵaldy, avtokólik kommýnaldyq turaqqa qoıyldy. Ákimshilik sottyń sheshimimen, áıel 15 táýlikke qamaýǵa alyndy jáne 7 jylǵa kólik aıdaý quqynan aıyryldy.
Nur-Sultan qalasynyń Polıtsııa departamenti avtokólik júrgizýshilerinen kólikti ishimdikke jáne esirtkige mas kúıde aıdamaýdy suraıdy.
