Nur-Sultanda Lıneınyı saıabaǵynda jańa turǵyn úı salynbaıtyn boldy
NUR-SULTAN. QazAqparat – Nur-Sultanda Lıneınyı saıabaǵynda jańa turǵyn úı kesheni salynbaıtyn boldy. Bul týraly elordalyq ákimdik málimdedi, dep habarlaıdy QazAqparat.
Ákimdiktiń habarlaýynsha, qurylys salýshyǵa ózge jer telimderi usynylady.
«Caspian Palace» TK jáne «Palazzo degli Affari» BO arasyndaǵy aýmaqta Syǵanaq, Á.Bókeıhanuly, sondaı-aq Kereı, Jánibek handar kósheleri jáne Máńgilik El dańǵyly kvadratynda buryn josparlanǵan kóppáterli turǵyn úı keshenderiniń ornyna (№77 mektep aýdany) turǵyndarǵa yńǵaıly bolý úshin gúlzar salynady. Aıta ketý kerek, jer ýchaskesi – qurylys salýshynyń jekemenshigi, egjeı-tegjeıli josparlaý barysynda kóppáterli turǵyn úı kesheni skverge ózgertildi», - dep jazylǵan ákimdik habarlamasynda.
Sonymen birge, ákimdik «Qalalyq romans» turǵyn úı kesheni aýdanyndaǵy jalpy bilim beretin mekteptiń qurylysy jaıly aıtyp berdi.
«2022 jyly 18 aqpanda «Nur-Sultan qalasy aýdandarynyń ınjenerlik, kólik ınfraqurylymyn jáne qala qurylysy aspektilerin uıymdastyrý jónindegi» jumys tobynyń keńesinde mynadaı másele qaraldy – osyǵan deıin josparlanǵan kóppáterli turǵyn úı keshenderi qurylysynyń ornyna (Á.Tynybaev, A.Hrapatyı jáne A11, A12 kósheleriniń kvadratynda) mektep salý úshin jer ýchaskesiniń egjeı-tegjeıli josparlaý jobasyn túzetý máselesi talqylandy. Jer – qurylys júrgizýshiniń jekemenshigi», - dep túsindirdi ákimdik.
Odan bólek, qoldanystaǵy jan-jaqty josparlaý jobasyna sáıkes, Buqar jyraý jáne Á. Bókeıhanuly kósheleriniń qıylysynda jalpy bilim beretin mektep, sol sııaqty balabaqsha jáne Aqnıet kóshesiniń boıyna jelekjol salý qarastyrylǵan. Jer – qurylys salýshynyń jekemenshigi, buryn bul orynǵa turǵyn úı kesheniniń qurylysy josparlanǵan.
Qala ákimdigi Qabanbaı batyr dańǵylyndaǵy Kereı, Jánibek handar jáne Orynbor kósheleriniń aralyǵynda ornalasqan medıtsınalyq ortalyqtyń qurylysyna qatysty jaýap berdi.
«Qala turǵyndarymen ótken kezdesýlerde aıtylǵandaı, Qabanbaı batyr dańǵyly boıynda Kereı, Jánibek handar jáne Orynbor kósheleriniń arasyndaǵy jer telimine medıtsınalyq ortalyq salynady. Buǵan deıin «Astana-Med» JShS-ǵa zertteý jumystaryn júrgizý úshin «Medıtsınalyq ortalyq» nysanyn jobalaýǵa ruqsat berilgen bolatyn. Biraq 2021 jyly «Astana-Med» JShS atalǵan aýmaqta qurylys-montajdaý jumystaryn tıisti ruqsat qujattarynsyz bastady. Nur-Sultan qalasynyń qalalyq orta sapasy jáne baqylaý basqarmasy qurylys salýshyǵa qatysty sharalar qabyldanyp, qurylysy toqtatyldy. Qoldanystaǵy egjeı-tegjeıli josparlaý jobasyna sáıkes atalǵan ýchaskede tek medıtsınalyq ortalyqty salý ǵana kózdelgenin atap ótken jón. Elordanyń keıbir aýdandarynyń egjeı-tegjeıli josparlaý jospary Memleket basshysynyń tapsyrmasy boıynsha qaıta qaraldy», - delingen habarlamada.
Úlken jáne Kishi Taldykól boıynsha eko-ýrbandalý qaǵıdatyna sáıkes, elordanyń saıabaq aımaqtarymen ıntegratsııalaý jumysy júrgizilýde. Osyǵan deıin habarlanǵandaı, Nur-Sultanda Úlken jáne Kishi Taldykól aýmaǵynda ekopark ashylady. Oǵan 1 mıllıard teńge kóleminde qarjy bólindi.
Qazirgi ýaqytta Úlken Taldykól boıynsha jobalaý-smetalyq qujattama ázirlendi. Kishi Taldykól sý nysanyndaǵy sý kólemin saqtap qana qoımaı, tolyqtyra otyryp, rekreatsııalyq aımaq qurý boıynsha jobalaý-smetalyq qujattama ázirlenip jatyr. «Nur-Sultan – jaıly qala» master-jospary boıynsha aýlalar men qoǵamdyq keńistikter (saıabaqtar, gúlzarlar, jelekjoldar) salýǵa kóńil bólinedi.
2022 jyly elordada 200-den astam qoǵamdyq keńistikti, aýlalar men gúlzarlardy abattandyrý josparlanyp otyr. Sońǵy jyldardyń ózinde 500 qoǵamdyq keńistik pen aýla salyndy.
