Nur-Sultanda qysqy trıatlon jarysy ótti
NUR-SULTAN. QazAqparat - Búgin Nur-Sultan qalasynyń Trıatlon parkinde el Táýelsizdiginiń 30 jyldyǵyna oraı qysqy trıatlonnan jekelegen jarys ótti, dep habarlaıdy QazAqparat.
Bul jaıynda qalalyq ákimdiktiń Instagram paraqshasy málimet taratty.
«Sýper sprınt» qashyqtyǵy boıynsha kásipqoılar men áýesqoılar arasynda ótken jarystyń uıymdastyrýshylary Nur-Sultan qalasynyń ákimdigi men Nur-Sultan qalasynyń trıatlon federatsııasy.
Sharanyń saltanatty ashylý rásimine QR Sport jáne Dene shynyqtyrý isteri komıtetiniń tóraǵasy Serik Sápıev, Nur-Sultan qalasy dene shynyqtyrý jáne sport basqarmasynyń basshysy Samat Erǵalıev jáne Nur-Sultan qalasy trıatlon federatsııasynyń prezıdenti Bırjanov Erjan Erikuly, «Teń múmkindikter álemi» qorynyń basshysy Nurgúl Uljekova qatysty.
Jarysqa tek elordalyqtar ǵana emes, sondaı-aq elimizdiń ár óńirinen 200-ge jýyq sportshy jınaldy.
Qatysýshylar:
júgirýden-2 shaqyrym;
velojarystan – 3 shaqyrym;
shańǵy jarysynan - 2,5 shaqyrym qashyqtyqta baq synady.
Qashyqtyqty belgilengen ýaqyttan keshiktirmeı aıaqtaǵan jeke jarystyń árbir qatysýshysy márede estelik medaldarmen marapattaldy.
Jas sanaty boıynsha I-II-III oryn alǵan sportshylar 23-25 aqpanda Nur-Sultan qalasynyń trıatlon federatsııasynyń keńsesinde arnaıy marapattalady.
Sondaı-aq, is-sharanyń qonaqtary men qatysýshylary úshin qoǵamdyq tamaqtaný aımaǵy (dalalyq as úı) uıymdastyryldy.
«Jarysty uıymdastyrýdaǵy basty maqsat - sport áýesqoılary men salaýatty ómir saltyn ustanýshylar arasynda trıatlon, velosport, jeńil atletıka jáne shańǵy sportyn damytý, salaýatty ómir saltyn nasıhattap, buqara halyqty sportpen aınalysýǵa shaqyrý»-dep atap ótti Dene shynyqtyrý jáne sport basqarmasynyń basshysy Samat Erǵalıev.
Jarystyń eń úlken qatysýshysy 62 jastaǵy Baızaq Talapnur uıymdastyrýshylarǵa alǵysyn jetkizdi:
«Qysqy trıatlon jarysy óte jaqsy ótýde. Barlyǵy joǵary deńgeıde uıymdastyrylǵan. Men bul jarysqa jylda qatysamyn. Búgin júgirýmen bastap, shańǵymen jarys jolyn aıaqtadym. Óte qýanyshtymyn. Barsha jastardy sportpen aınalysýǵa shaqyramyn»,-dedi Baızaq Saǵyndyquly.
Aıta keteıik qatysýshylardan jınalǵan qarajat «Salamatty bolashaq» - «Sport barshaǵa» áleýmettik jobasyn qoldaý úshin «Teń múmkindikter álemi» qaıyrymdylyq qoryna aýdarylady.
