Nur-Sultanda qylmystyq top 20 mln teńgeniń júk kóligin urlap ketken
NUR-SULTAN. QazAqparat – 40-55 jas aralyǵyndaǵy bes kúdikti quny 20 mln teńge bolatyn 2019 jyly shyqqan «SHACMAN» markaly júk kóligin aıdap áketti, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.
«102» pýltine JShS dırektory júgingen. Ol qurylys nysany aýmaǵynan túngi ýaqytta júkti ózi túsiretin júk kóligi joǵalyp ketkenin habarlaǵan.
48 jastaǵy kúdikti buryn atalǵan JShS-da jumys istep, óziniń júk kólikterin paıdalanýǵa berip júrip, «SHACMAN» markaly júk kóligin aıdap áketýdi oılastyrǵany anyqtaldy.
Qylmystyq nıetin júzege asyrý úshin ol dostaryn urlyqqa tartqan. Túngi ýaqytta qurylys nysanynyń aýmaǵyna kirgen olar júk kóligin urlap ketken.
Júk kóligimen izin jasyryp, urlyq jasaýshylar oǵan uqsas basqa júk kóliginen nómir alyp, urlanǵan kólik nómirin ózgertken.
Polıtsııa qyzmetkerleri dereý qala mańyndaǵy barlyq aýyldy aralap, iri kólik turaqtaryn teksergen, biraq odan nátıje bolmaǵan.
«Odan ári izdestirý sharalaryn júrgizý barysynda polıtseıler tynymsyz jumystyń nátıjesinde qylmyskerlerdiń izine túsken. Qaskúnemder olardan seziktenip, Monastyrka aýylyna júk kóligin aıdap áketkeni anyqtaldy. Onda olar bir apta boıy kólikti angarda ustaǵan. Keıinnen kólik quraly Arqalyq qalasyna jetkizilgen, onda júk kóligi bólshektelip, ishinara qosalqy bólshekteri satylǵan»,- deıdi Nur-Sultan qalasy PD krımınaldyq polıtsııa basqarmasynyń basshysy Dmıtrıı Demıdov.
Avtokólik bólshekteriniń jartysyn polıtsııa qyzmetkerleri Arqalyq qalasynyń turǵynynan alǵan. Ol kúdiktilerdiń ótinishi boıynsha kólikti iri aqshalaı syıaqy úshin bólshektegen.
Qazirgi ýaqytta «SHACMAN» markaly júk kóligin urlaǵan kúdiktilerdiń barlyǵy ustaldy. Atalǵan fakti boıynsha qylmystyq is qozǵaldy.
