Nur-Sultanda qylmys deńgeıi 37% tómendedi

«Nur-Sultan qalasynda «Zorlyq-zombylyqsyz 16 kún» aktsııasy ótip jatyr. Aktsııa 25 qarashada bastalǵan. Búgin osy aktsııany qorytyndylaımyz. Osy Antıkor ortalyǵymen birlese jumys isteýdegi maqsat – halyqty aqparattandyrý, ıańnı sizderdiń platforma arqyly atqarylyp jatqan jumys týraly aqparat berý. Osy jyldyń 11 aıy boıynsha aqparat berip ótsek, áıelderdiń zańdy quqyqtary men múddelerin qorǵaý máselesi Memleket basshysynyń baqylaýynda jáne bul másele osy jyldyń 1 qyrkúıeginde Qazaqstan halqyna Joldaýynda da kórinis tapqan bolatyn. Qazirgi ýaqytta turmystyq zorlyq-zombylyq faktileriniń ósýi baıqalady. Oǵan sebep – bıyl pandemııaǵa baılanysty adamdardy oqshaýlaýǵa májbúrleý jaǵdaıy. Pandemııa kezinde bir bólmeli páterde birneshe otbasy múshesi birge turǵan jaǵdaılar boldy. Sebepsiz dúkenge, dalaǵa shyqpaý týraly talaptar, kóp adamnyń jumyssyz qalýy balaǵa da, eresekterge de keri áserin tıgizdi. Osy sebepti turmystyq zorlyq-zombylyq faktileri artty», - deıdi Nur-Sultan polıtsııa departamenti jergilikti polıtsııa qyzmeti basqarmasy áıelderdi zorlyq-zombylyqtan qorǵaý bólimshesiniń aǵa ınspektory Gúlmıra Shrahmetova.

Onyń aıtýynsha, 11 aıdyń qorytyndysy boıynsha qylmystyń tirkelýi 37,1% tómendedi.

«Qazirgi tańda bizde qylmysty ashý jaqsy jolǵa qoıylǵan. Qazir tsıfrlyq tehnologııa zamany, sondyqtan qylmysty ashý burynǵy jyldarmen salystyrǵanda áldeqaıda ońaı. Qylmystyń aldyn alý sharalary boıynsha jumystar da kúsheıtildi. Qazirgi ýaqytta polıtsııa qyzmetkerleri 24/7 rejıminde jumys isteıdi. Jalpy turmystyq salada jasalatyn quqyq buzýshylyq, qylmystyń kóbi alkogol ishimdiktiń kesirinen oryn alady. Elordada 10 myń turǵynǵa shaqqanda qylmys deńgeıi 40,2% tómendedi», - deıdi ol.