Nur-Sultanda kýáliksiz taksı júrgizgender ustaldy
NUR-SULTAN. QazAqparat – Astanada 10 qazannan beri «Avtobýs» jedel sharasy aıasynda polıtseıler júzden astam ereje buzý derekterin anyqtady. Onyń ishinde taksı júrgizýshiler de bar, dep habarlaıdy QazAqparat Nur-Sultan PD baspasóz qyzmetine silteme jasap.
Taksı júrgizýshiler ereje buzǵan 50-den astam derek anyqtaldy. Olardyń keıbiri qajetti qujattary bolmasa da, kólik júrgizgen, keıbireýleri Jolaýshylardy jáne júkti tasymaldaý erejelerin buzǵan, endi bireýleriniń júrgizýshi kýáligi bolmaı shyqty.
Ótken táýlikterde 7 taksıst ákimshilik jaýapqa tartyldy, kýáliksiz taksı júrgizgen 2 adamnyń kóligi aıyp alańyna jiberildi.
Respýblıka kólemindegi «Avtobýs» jedel-profılaktıkalyq sharasy 17 qazan kúni aıaqtalady.
