Nur-Sultanda kóshi-qon zańnamasyn buzǵan sheteldikter 27 mln teńge aıyppul tóledi

NUR-SULTAN. QazAqparat – Bıyl 3 aıdyń ishinde Qazaqstannyń kóshi-qon zańyn buzǵan shetel azamattaryna 27 mln teńge aıyppul salyndy. Bul týraly Nur-Sultan qalasy polıtsııa departamenti kóshi-qon qyzmeti basqarmasynyń basshysy Arman Baımuhamet málim etti, dep habarlaıdy QazAqparat tilshisi.

«Jyl basynan beri elimizdiń kóshi-qon zańyn buzýǵa qatysty 2297 fakti tirkeldi. Elorda aýmaǵynda jedel profılaktıkalyq sharasy turaqty uıymdastyrylyp turady. Atalǵan shara aıasynda talapty buzyp, el aýmaǵynda zańsyz júrgen shetel azamattary anyqtalyp jatady. Júrgizilgen sharalardyń nátıjesinde kóshi-qon zańyn buzǵan shetel azamattaryna 27 mln teńge aıyppul salyndy. Bul bıylǵy 3 aı boıynsha kórsetkish. Ótken jyldyń osy ýaqytynda 20 mln teńgege aıyppul salynǵan edi», - dedi Arman Baımuhamet polıtsııa departamentinde ótken baspasóz máslıhatynda.

Onyń aıtýynsha, sheteldik mıgranttar negizinen Qazaqstan aýmaǵynda bolý erejesin buzady.

«Olar Qazaqstanǵa ýaqytsha turýǵa, jumys isteýge nemese saıahattap keledi. Solardyń ishinde maýsymdyq jumys isteýge kelgender zańdy jıi buzyp jatady. Mıgranttar Qazaqstanda ýaqytsha bolý merzimi aıaqtalǵan soń, qaıta tirkelýi tıis. Al olar bolsa tirkelmeı júre beredi», - deıdi ol.

Buǵan deıin polıtsııa departamentiniń ókili 2023 jyldan bastap astanalyqtarǵa jeke kýálik berilgende saýsaq izi alynatynyn aıtqan edi.

Sondaı-aq, brıfıngte Reseıden kelgen 48 azamat pen 10 ýkraınalyq elordada turýǵa ótinish bergeni sóz boldy.