Nur-Sultanda koronavırýstyń ósýine Býrabaıdaǵy demalys áser etti - Tımýr Muratov
NUR-SULTAN. QazAqparat – Nur-Sultan qalalyq qoǵamdyq densaýlyq saqtaý basqarmasynyń basshysy qalada vırýs juqtyrǵandar sanynyń aıaq-astynan kóbeıý sebebin aıtty, dep habarlaıdy QazAqparat tilshisi.
«Keshe elordada 1500-den astam adam koronavırýs indetine shaldyqty. Bul óte joǵary kórsetkish. Odan bólek, 2245 adam statsıonarlyq emdi talap etedi, qazir olar aýrýhanada jatyr. Jáne 8 myńnan astam naýqas emhanada jáne 201 adam reanımatsııada em alýda. Ókinishke qaraı, ólim jaǵdaıy da joq emes, kúnine 15 naýqas atalǵan indetten mert bolýda. Búginde densaýlyq saqtaý salasy qıyn sátti bastan keshýde, árıne biz óz kezegimizde bar kúsh-jiregimizdi jumsaımyz. Statıstıka kórsetip otyrǵandaı qazir qaladaǵy indettiń qarqyny ótken jylǵy jazǵy jaǵdaıdy qaıtalap otyr, tipti odan da joǵary bolmasa tómen emes. Bar-joǵy 2-3 kúnniń ishinde koronavırýs juqtyrýshylardyń qarqyny kúrt ósti. Kórsetkish demalys kúnderi Býrabaıda demalyp kelgen turǵyndardyń esebinen joǵary bolyp otyr. Demalys kezinde astanalyqtardyń Býrabaıǵa aǵylǵanyn bárińiz baıqańyzdar», - dedi Tımýr Muratov Instragramdaǵy tikeleı efırde.
Buǵan deıin basqarma basshysy búginde elordada 6 myńnan astam dáriger atalǵan indetpen kúresip jatqanyn málim etti.
