Nur-Sultanda koronavırýspen kúres baǵytynda qandaı sharalar atqarylýda

NUR-SULTAN. QazAqparat - Elorda ákiminiń orynbasary Baqtııar Máken qalanyń qoǵamdyq keńesiniń otyrysynda koronavırýs pandemııasymen kúres boıynsha qabyldanyp jatqan sharalar týraly aıtyp ótti, dep habarlaıdy QazAqparat.

Máselen, 2020 jyldyń basynda elordada tek 1 PTR-zerthana jumys istese, qazir 17 zerthana bar. Sonymen qatar, taldaý nátıjelerin kútý ýaqyty bastapqydaı birneshe kúndi emes, 4 saǵatty alady.

Elordaǵa 6 qazannan bastap búginge deıin bortynda 59 026 jolaýshysy bar 457 reıs qondy, olardyń shamamen 10 myń jolaýshysy karantındik statsıonarǵa jatqyzyldy. 74 jolaýshydan koronavırýs anyqtaldy, olarǵa qajetti medıtsınalyq kómek kórsetildi.

Karantındik shekteýlerdiń saqtalýyn baqylaý maqsatynda qalada 9 mobıldi top qurylyp, 5 myńnan astam nysan tekserildi. Karantındi buzýshylar jaýapkershilikke tartylady. Jedel medıtsınalyq járdem stantsııasynyń bazasynda call-ortalyq jumysyn jalǵastyrýda. Onda qala turǵyndary KVI boıynsha kez kelgen ýaqytta júgine alady.

Sonymen qatar, elordanyń barlyq medıtsınalyq mekemeleri qosymsha jabdyqtarmen, dári-dármektermen, medıtsınalyq maskalarmen jáne qorǵanys quraldarymen jabdyqtaldy. Sonymen qatar, qalada medıtsına stýdentterinen kadrlyq rezerv jasaqtaldy.

B.Máken densaýlyq saqtaý salasyn damytý týraly aıta kele, Memleket basshysynyń tapsyrmasyna sáıkes azamattardy «qadamdyq qoljetimdilikte» medıtsınalyq kómekpen qamtamasyz etý jumystary júrgizilip jatqanyn atap ótti.

Máselen, qalada 29 «úıdegi dáriger» nysany 180 myńǵa jýyq adamdy qamtydy. Sonymen qatar, otbasy ınstıtýtyn damytý maqsatynda 4 Ońaltý ortalyǵy ashyldy.