Nur-Sultanda koronavırýs juqtyrǵandarmen baılanysta bolǵandardyń barlyǵy anyqtaldy
NUR-SULTAN. QazAqparat – Nur-Sultanda koronavırýs juqtyrǵandarmen jaqyn baılanysta bolǵan týǵan-týystary men ushaqta birge kelgen adamdardyń bárin anyqtaý jumysy aıaqtaldy. Bul týraly qalalyq qoǵamdyq densaýlyq saqtaý basqarmasynyń basshysy Sáýle Qısyqova aıtty, dep habarlaıdy QazAqparat tilshisi.
«Nur-Sultanda koronavırýs juqtyrǵandarmen jaqyn baılanysta bolǵan adamdardy, ıaǵnı otbasy múshelerin jáne ushaq bortynda eki oryndyq boıynsha qashyqtyqta bolǵandardy anyqtaý jumysy aıaqtaldy. Qazirge deıin Nur-Sultan qalasynyń statsıonarlaryna 138 adam aýrýhanaǵa jatqyzyldy. Elordadan shyǵyp ketkender óńirlerdegi aýrýhanalar men ınfektsııalyq statsıonarlarǵa jatqyzyldy», - dedi basqarma basshysy onlaın formatta ótken baspasóz máslıhatynda.
Sáýle Qısyqova sonymen qatar 323 adam úı karantınine jatqyzylǵanyn jetkizdi.
«Búgingi kúni koronavırýs ınfektsııalyq juqtyrýdyń taǵy jeti jaǵdaıy tirkeldi. Bul – buryn koronavırýs anyqtalǵan adamdarmen baılanysta bolǵan adamdar. Olar birden úı karantınine oqshaýlanyp, olarmen laborotorııalyq zertteý júrgizildi», - dedi ol.
Eske sala ketsek buǵan deıin Sáýle Qısyqova elordada koronavırýs juqtyrǵandardyń jaǵdaıy týraly aıtyp bergen bolatyn.
