Nur-Sultanda koronavırýs juqtyrǵandar sany eki ese tómendedi
Sáýle Qısyqovanyń aıtýynsha, astanada qazirgi ýaqytta koronavırýs ınfektsııasyn juqtyrýdyń 1 287 jaǵdaıy tirkelgen. 602 adam jazylyp shyqqan.
«Ótken táýlikte koronavırýs juqtyrýdyń taǵy 36 faktisi tirkeldi. Ósim – 2,9 paıyz. Onyń ishinde KVI juqtyrǵan azamattarmen jaqyn qarym-qatynasta bolǵandardyń sany – 21. Statsıonarda pnevmonııamen, JRVI-men jatqan 9 adamnan da koronavırýs rastaldy. Bir jaǵdaı epıdemıologııalyq ahýal turaqsyz óńirden kelgenderdiń ishinen anyqtaldy. 5 jaǵdaı alǵashqy medıtsınalyq-sanıtarlyq kómekke júgingen adamdardyń ishinen belgili boldy», - dedi Sáýle Qısyqova OKQ-da ótken baspasóz máslıhatynda.
Basqarma basshysy elordada osy ýaqytqa deıin 75 myń PTR-testileý, 32 myń ekspres-testileý júrgizilgenin málim etti.
«Mamyrdyń alǵashqy aptasynda koronavırýs ınfektsııasynyń 376 jaǵdaıy tirkelgen edi. Ortasha ósim ol kezde 6,4 paıyzdy quraǵan. Mamyrdyń ekinshi aptasynda 185 adam anyqtaldy. Ortasha ósim 2,3 paıyzdy kórsetti. Jańa jaǵdaılardyń eki ese tómendegeni baıqalady», - dedi ol.