Nur-Sultanda koronavırýs juqtyrǵan 12 adam aýyr kúıde jatyr
NUR-SULTAN. QazAqparat – Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova koronavırýs ınfektsııasy boıynsha statıstıkany jarııalady, dep habarlaıdy QazAqparat tilshisi.
«Jalpy elordada koronavırýs ınfektsııasyn juqtyrǵan 631 adam anyqtaldy. Onyń 36 paıyzy jazylyp, 14 kúndik úı karantınine shyǵaryldy. Juqtyrǵandardyń ishinde er adamdardyń úlesi 55, áıelderdiń úlesi 45 paıyz. KVI juqtyrǵandardyń ishinde 18-29 jas jáne 30-49 jas aralyǵyndaǵy adamdardyń úlesi 36 paıyzdy qurady. 50-59 jas aralyǵynda azamattardyń úlesi – 14 paıyz. 60-69 jas aralyǵylar – 6,5 paıyz, balalardyń úlesi 4,2 paıyz», - Sáýle Qısyqova dedi Densaýlyq saqtaý mınıstrliginiń Facebook-tegi paraqshasynda bergen suhbatynda.
Basqarma basshysynyń aıtýynsha koronavırýs juqtyrǵandardyń 3,7 paıyzyn 70 jáne odan da kári jastaǵylar quraıdy.
«Sońǵy táýlikte elordada 16 jaǵdaı tirkeldi. Onyń ishinde 8 jaǵdaı naýqaspen jaqyn qarym-qatynasta bolǵan adamdar. Olar osyǵan deıin úı karantıninde bolǵan azamattar. Eki jaǵdaıda vırýsqa kúdikti adamdardyń monıtorıngi barysynda belgili boldy. Eki jaǵdaı observatsııalyq emhanada JRVI belgisimen túsken azamattardyń ishinen anyqtalyp otyr», - dedi ol.
Elordada búgingi kúni 2724 adam úı karantıninde ornalastyrylǵan.
«Aýrýhanada búgingi kúni 1065 naýqas em alýda. Onyń ishinde koronavırýs ınfektsııasy anyqtalǵan azamattardyń sany 395. Onyń ishinde 12 naýqastyń jaǵdaıy turaqty aýyr dep sanaımyz. Tórt naýqas respýblıkalyq ıntensıvti terapııa ortalyǵynda em alyp jatyr. Tórt naýqas ókpeni jasandy jeldetý apparatyna qosylǵan», - dedi ol.
