Nur-Sultanda koronavırýs órship barady
NUR-SULTAN. QazAqparat - Epıdemıologııalyq jaǵdaıdyń nasharlaýyna jáne COVID-19 aýrýynyń ósýine baılanysty Nur-Sultanda taǵy bir qalalyq aýrýhana ınfektsııalyq statsıonarǵa aınaldy, dep habarlaıdy QazAqparat qala ákimdiginiń resmı saıtyna silteme jasap.
Endi №1 Kópbeıindi qalalyq aýrýhana 9 shildeden bastap koronavırýstyq ınfektsııasy bar patsıentterdi qabyldaıdy. Onda 600 tósek-oryn ornalastyrylǵan. Bul shara tósek-oryndarynyń jetkiliksiz bolýy sebepti qabyldandy, dep túsindirdi qalalyq Qoǵamdyq densaýlyq saqtaý basqarmasy.
«Ókinishke oraı, biz taǵy bir qalalyq aýrýhanada josparly gospıtalızatsııany toqtatýǵa, ony kovıdtik statsıonarǵa aınaldyrýǵa májbúr bolyp otyrmyz. Sebebi ınfektsııa juqtyrǵandar sany azaımaı tur. Barlyq patsıent aýystyryldy. Aldaǵy ýaqytta olardy qalanyń respýblıkalyq jáne vedomstvolyq klınıkalaryna jiberemiz», - dep túsindirdi qalalyq Qoǵamdyq densaýlyq saqtaý basqarmasynyń basshysy Tımýr Muratov.
Osylaısha qala turǵyndaryn aýrýhanaǵa jatqyzý statsıonarlardyń kezekshiligine sáıkes júrgiziledi. Sondaı-aq, gınekologııadan bólek, táýlik boıy jáne kúndizgi statsıonarǵa josparly jatqyzýdy №2 kópbeıindi qalalyq aýrýhana da ýaqytsha toqtatady.
Ótken jazda №1 kópbeıindi qalalyq aýrýhana KVI naýqastaryn emdeıtin statsıonarǵa aýystyrylǵan bolatyn. Al tamyz aıynyń sońynda koronavırýs ınfektsııasy bar sońǵy naýqas shyǵarylǵan soń burynǵy profıldik jumysyna qaıta kirisken.
«Epıdemıologııalyq jaǵdaı nasharlap barady. Sońǵy aptada biz úsh aýrýhanany ınfektsııalyq statsıonarǵa aýystyrdyq. Qaladaǵy epıdemıologııalyq jaǵdaı týraly turǵyndardyń ınfektsııa joıyldy, karantındi umytýǵa bolady degen pikiri bizge aýyr tıedi. Elorda naýryz aıynan beri «qyzyl» aımaqtan shyqpaǵanyn taǵy da eske salyp óteıin. Bul kórsetkish turǵyndarymyzdyń sanıtarlyq talaptardy saqtaýdaǵy jaýapkershiligine tikeleı baılanysty», - dep túıindedi vedomstvo basshysy.
Tımýr Muratov táýligine aýrýhanaǵa jatqyzylǵandardyń sany 300 adamǵa jetkenin atap ótti. Aıtýynsha patsıentter aýyr jáne óte aýyr kúıde túsip jatyr.
Esterińizge sala keteıik, ótken demalys kúnderi ınfektsııamen aýyrǵandardyń kóbeıýine baılanysty qosymsha eki aýrýhana ınfektsııalyq statsıonarǵa aýystyrylǵan: qalalyq psıhıkalyq densaýlyq ortalyǵy jáne QR Qorǵanys mınıstrliginiń Bas áskerı klınıkalyq gospıtali. Al jalpy tósek-oryn sany -300.
Nur-Sultan qalasy boıynsha 9 shilde kúni ınfektsııalyq statsıonarlarda barlyǵy 2 007 naýqas bar, bul tósek júktemesiniń 81%-yn quraıdy. Onyń ishinde 156 adam (139 KVI) reanımatsııa bólimshesinde (júkteme 78%), 28 patsıent ókpeni jasandy jeldetý apparatynda jatyr. BMSK uıymdarynda 7 088 naýqas koronavırýstyq ınfektsııa boıynsha em alýda.
