Nur-Sultanda koronavırýs naýqastaryn emdeıtin taǵy bir statsıonar jabyldy
NUR-SULTAN. QazAqparat - «Ramada Plaza» ǵımaratynda ornalasqan juqpaly aýrýlar statsıonary jabylýda. Búgin bul jerden koronavırýs ınfektsııasy jáne pnevmonııamen aýyrǵan sońǵy 20 naýqas shyǵaryldy, dep habarlaıdy QazAqparat tilshisi.
№3 qalalyq kópsalaly aýrýhananyń terapevti Dáýren Moldajanovtyń aıtýynsha, 1 shildeden bastap osy aýrýhanada COVID-19 aýrýy bar 1 myńǵa jýyq naýqas emdelgen.
«Bul statsıonar óz mindetin tolyq oryndady. Nur-Sultan ákimdigi ottegi kontsentratorlaryn jetkizdi. Naýqastardy kútý úshin barlyq medıtsınalyq jabdyqtar men dári-dármek boldy. Bul bizge joǵary sapaly medıtsınalyq kómek kórsetýge múmkindik berdi», – deıdi D.Moldajanov.
Zeınetker Bıbijan Qapparova kóp adamdar sııaqty aýrýdyń alǵashqy belgileri baıqalǵanda óz betinshe emdelgen. Biraq kóp uzamaı syrqatty medıtsınalyq kómeksiz jeńe almaıtynyn túsingen.
«Men segiz kún boıy úıde emdeldim. Sodan keıin ǵana jedel járdem shaqyrýǵa sheshim qabyldadym. Meni osy aýrýhanaǵa alyp kelip, on kún emdedi. Dárigerlerime, barlyq medıtsına qyzmetkerlerine alǵysym shaksiz. Ózderine tóngen qaterge qaramastan basqalardyń ómirin saqtap qalǵandaryńyz úshin rahmet! Bizde osyndaı jaýapkershilikti, adam janyna arasha bolar jas mamandardyń baryna qýanyshtymyn!» – deıdi Bıbijan apa.
Jalpy, qalada COVID-19-ǵa qarsy kúreske 16 statsıonar jumyldyrylǵan. Esterińizge sala keteıik, 27 shildede Psıhıkalyq densaýlyq ortalyǵynyń klınıkasynan COVID-19 bar sońǵy naýqas shyǵaryldy.
Bir jarym aıdyń ishinde munda 1044 naýqas emdeldi. Shilde aıynyń basynan bastap Nur-Sultan statsıonarlarynda pnevmonııamen aýyratyndar sany 5 ese azaıdy.
Qabyldanǵan karantın sharalary men qala emhanalarynda ambýlatorııalyq emdeýdi kúsheıtý nátıjesinde jedel járdem stantsııasyna qońyraýlar sany 3 ese – kúnine 3 myńnan myńǵa deıin, tósek-oryn qorynyń júktemesi 99%-dan 30%-ǵa azaıdy.
