Nur-Sultanda kópqabatty úı órtendi – 3 bala qutqaryldy
NUR-SULTAN. QazAqparat – Nur-Sultanda kópqabatty úıden órt shyǵyp, 3 bala qutqaryldy, dep habarlaıdy QazAqparat tilshisi.
«14 qazan kúni 101 pýltine Saryarqa kóshesindegi 11-úıdiń 7-qabattyndaǵy balkonnan tútin shyqqany týraly habarlama kelip tústi. Saǵat 09.21-de Nur-sultan qalasy TJ departamentiniń Órt sóndirý bólimsheleriniń 20 qutqarýshysy men 6 tehnıkasy shaqyrý ornyna shyqty. Olar 7-qabatta 10 sharshy metr alańda úı zattary men tereze jaqtaýy órtengenin jáne 8-qabattyń balkony zardap shekkenin anyqtady. Úı turǵyndary ózderi evakýatsııalanǵan», - dep habarlady Nur-Sultan qalasy TJD baspasóz qyzmeti.
Órt saǵat 09.32-de oqshaýlandy jáne saǵat 09.48-de tolyq sóndirildi.
«Elordalyq órt sóndirýshilerdiń biri 4 adamdy qutqardy, onyń arasynda 3 bala bar. Qaza bolǵandar joq, qazirgi ýaqytta qutqarylǵan turǵyndar jeńil dárejedegi ýlaný dıagnozymen №1 qalalyq aýrýhanaǵa jáne №2 qalalyq balalar aýrýhanasyna jetkizildi. Órttiń shyǵý sebebi anyqtalýda», - deıdi qalalyq TJD.
