Nur-Sultanda kópqabatty turǵyn úı qulaǵaly tur degen aqparat - feık
NUR-SULTAN. QazAqparat – El astanasyndaǵy turǵyn úılerdiń biriniń qulaıyn dep turǵany týraly aqparat jalǵan bolyp shyqty, dep habarlaıdy QazAqparat «Elorda Damý» JShS resmı saıtyna silteme jasap.
Mekeme saıtynyń habarlaýynsha, jalǵan málimet aıtylǵan vıdeony taratqan adamdy anyqtaý úshin materıal quqyq qorǵaý organdaryna tabystaldy.
Áleýmettik jeli men messendjerlerde belgisiz adamnyń beınehabarlamasy tarap jatyr. Ol Ýálıhanov kóshesindegi 25-úıdiń shógip bara jatqanyn jáne qulaý qaýpi tónip turǵanyn málimdegen.
Osyǵan baılanysty qalalyq sapany baqylaý basqarmasy, tapsyrys berýshi, merdiger uıym men qyzmet kórsetýshi uıym ókilderinen quralǵan komıssııa 11 shilde kúni turǵyn úıdi qarap, tekseristen ótkizdi.
«Tekserý barysynda qurylystyń sapasyzdyǵy rastalmady, sol sebepti ǵımaratqa qulaý qaýpi tónip turǵan joq» dep atap ótti komıssııadaǵylar.
Jalǵan aqparat taratqan azamatty anyqtaý úshin vıdeo quqyq qorǵaý organdaryna tabystaldy.
