Nur-Sultanda kópirden sekirmek bolǵan 16 jasar qyz qutqaryldy

NUR-SULTAN. QazAqparat – 2 qyrkúıek kúni Nur-Sultan qalasynyń polıtsııa bólimine Saraıshyq kóshesinde ornalasqan kópirde boıjetkenniń sýǵa sekireıin dep turǵany týraly habarlama kelip túsken, dep habarlaıdy QazAqparat.

Jedel basqarý ortalyǵynyń operatorlary kámelet jasyna jetpegen qyz balanyń ornalasqan jerin shuǵyl anyqtady. Bes mınýttyń ishinde oqıǵa ornyna polıtsııa departamenti patrýl polıtsııa polkiniń qyzmetkerleri – Qaıyrbekov Baýyrjan, Alpysbaev Erjan, Qasenov Mádı jáne Amantaı Ádiletten quralǵan eki ekıpaj kelip jetti.

Kópir taıanyshynda otyryp, tómenge sekirmek bolǵan qyzdy kórgen tártip saqshylary ony áńgimege tartýǵa tyrysty. Kapıtan Baýyrjan Qaıyrbekovtiń aıtýynsha, qyz bala olardyń sózin elemeı, kúızelis jaǵdaıynda bolǵan. Ol qasyna eshkimniń jaqyndamaýyn ótinip, aıqaılady.

Polıtsııa qyzmetkeri Amantaı Ádilet boıjetkenniń qarsylasqanyna qaramastan ony qushaqtap alyp, áriptesterimen birge qaýipsiz jerge shyǵaryp aldy.

Ózine qol jumsamaq bolǵan 16 jasar qyz bala ata-anasymen birge Esil aýdanynyń polıtsııa basqarmasyna jetkizildi. Qazirgi kezde jasóspirimmen psıholog mamandar áńgimelesýde.

Elordalyq polıtsııa departamentiniń basshylyǵy qyzmet kezinde jedel áreket etken tártip saqshylaryn marapattaıdy.