Nur-Sultanda kópir astynda taǵy bir jańa art-keńistik paıda bolady
NUR-SULTAN. QazAqparat - Nur-Sultanda L.Gýmılev atyndaǵy Eýrazııa ulttyq ýnıversıtetiniń janyndaǵy kópir astynda jańa qoǵamdyq keńistik jasaldy. Onda strıtbol, konkı, ústel tennısi jáne jattyǵý alańdary bolady, dep habarlaıdy QazAqparat tilshisi.
Qala ákimdiginiń aqparatyna sáıkes, elordadaǵy «Arqar» kópiriniń astyndaǵy aýmaqta demalys aımaqtary keńeıtilip, olar jańa graffıtımen tolyqtyrylǵan. Sporttyń belsendi túrine arnalǵan aımaq Gennadıı Golovkın beınelengen mýralmen bezendirilgen. Ol kóshe fıtnesi jabdyqtarymen, workout alańymen, ganteldermen, shtangalarmen jáne t.b. jabdyqtalady. Jaqyn jerde balalarǵa arnalǵan aımaq bolady.
Óner týyndylaryn Qazaqstannyń ár qalalarynan kelgen daryndy sýretshiler salǵan. Qazirgi ýaqytta munda retteý jumystary júrgizilýde. «Arqar» kópiriniń astyndaǵy keńistik Trıatlon jáne Prezıdent saıabaqtaryn biriktirdi.
Elorda ákimdigi qala turǵyndarynyń demalysy úshin jaıly jaǵdaı jasaýǵa aıryqsha kóńil bólýde. Osylaısha bos jatqan jerler úlken aýlalyq alańdarmen, shaǵyn saıabaqtarmen jáne jaıly býlvarlarmen jabdyqtalǵan.
Mysaly, buǵan deıin Shákárim Qudaıberdiuly dańǵyly 17/6 bos jatqan aımaq bolǵan. Qazir munda úlken abattandyrylǵan aımaq, onyń ishinde fýtbol alańy bar. Avtoturaq máselesi sheshildi.
Bıyl 50 qoǵamdyq oryn (saıabaqtar, skverler, býlvarlar) jáne 150 aýla jabdyqtalady.
Aýlalar men qoǵamdyq oryndar «Nur-Sultan – jaıly qala» bas jospary tujyrymdamasy aıasynda abattandyrylýda.
