«Nur-Sultanda kópbalaly analardyń 5 qabattan qulaǵany» týraly vıdeo - jalǵan

NUR-SULTAN. QazAqparat – WhatsApp jelisinde adamdardyń keptelip, 5 qabattan qulaǵany týraly vıdeo taralyp jatyr. Oqıǵa Nur-Sultanda boldy dep jazylǵan. Bul shyndyqqa sáıkes kelmeıdi, dep habarlady Stopfake.kz.

Beınejazbanyń basynda «Nur-Sultanda kópbalaly analarǵa 8 naýryz qurmetine 17 dollardan beriledi» dep jazylǵan.

«Nazar aýdaryńyz! Vıdeoda qaza tapqan adamdar kórsetiledi. Kadrda bir top adam kópqabatty ǵımarattyń joǵarǵy qabatynda kele jatyr. Adamdardyń salmaǵyn kótere almaǵan dáliz taıanyshtary qırap, birneshe adam tómenge qulaǵan. Bul qaıǵyly oqıǵa Bolıvııada El-Alto ýnıversıtetinde bolǵan. Ekonomıka, qarjy jáne ákimshilik ǵylymdar fakýltetiniń stýdentteri jınalysqa bara jatqan.

Oqıǵanyń Qazaqstanǵa esh qatysy joq. Vıdeonyń Nur-Sultanda túsirilgeni týraly málimdeme – feık. Ony vıdeodaǵy adamdardyń ne qazaqsha, ne oryssha sóılemeıtininen de baıqaýǵa bolady», - dep túsindirdi Stopfake.kz.