Nur-Sultanda kólik polıtseıleri qyzmet babynda qaza tapqan áriptesterin eske aldy
NUR-SULTAN. QazAqparat - Búgin QR ІІM Kóliktegi polıtsııa departamentinde Otan aldyndaǵy boryshyn óteý kezinde qaza tapqan polıtseılerdi eske aldy, dep habarlaıdy deparmatenttiń baspasóz qyzmeti.
Saltanatty is-shara departament ǵımaratynyń aldyndaǵy «Máńgilik umytylmas esimder» monýmentine gúl shoqtaryn qoıýdan bastaldy. Rásimge departament basshylyǵy, jeke quram, ishki ister organdarynyń ardagerleri men qyzmettik boryshyn atqarý kezinde qaza tapqan qyzmetkerlerdiń týystary qatysty.
«Týǵan el men jerge, antqa adaldyq tanyta otyryp, shynaıy qaharmandyqtyń úlgisin kórsetken batyrlarymyzdyń esimderi kólik polıtsııasynyń tarıhyna óshpes iz qaldyrdy. Bul kúni biz óz Otanynyń naǵyz patrıottaryn, táýelsiz elimizde beıbitshilik pen turaqtylyqty saqtaý úshin ómirlerin qıǵan qyzmetkerlerdi eske alýǵa mindettimiz jáne olardyń otbasyna udaıy qamqorlyq kórsetý bizdiń azamattyq boryshymyz», - dedi departament bastyǵy polıtsııa polkovnıgi Amanjol Qabylov.
Eskertkish mańyna jınalǵandar qyzmet babynda qaza bolǵan áriptesterin bir mınýt únsizdikpen eske aldy.
Budan soń kásibı merekege arnalǵan shara departamenttiń akt zalynda jalǵasty. Oǵan basshylyq, jeke qurammen birge ishki ister organdarynyń ardagerleri de qatysty.
Elimizdiń bas kólik polıtseıi áriptesterine myqty densaýlyq, olardyń qoǵamdyq tártip pen qaýipsizdikti qamtamasyz etýdegi qyzmetterine mol tabys tiledi. Sondaı-aq, ol uzaq jyldar jastarǵa patrıottyq tárbıe berip kele jatqan ishki ister organdarynyń ardagerlerine júrekjardy alǵysyn bildirdi.
Óz kezeginde ishki ister organdarynyń ardagerleri de quttyqtaý sóz sóıledi.
QR ІІM jáne departamenttiń buıryǵymen qyzmettik mindetterin úlgili oryndaǵany jáne qol jetkizgen joǵary kórsetkishteri úshin 200-den astam qyzmetker gramotalarmen jáne alǵys hattarmen marapattaldy.
Olardyń arasynda úzdik tergeýshiler, jedel ýákilder, krımınalıster, anyqtaýshylar jáne taǵy basqalar boldy.
Máselen, Nur-Sultan qalasy Halyqaralyq áýejaıynda Jelilik polıtsııa bólimi bastyǵynyń orynbasary Maqsat Ábikenniń ishki ister organdarynda qyzmet jasaǵanyna 17 jyl bolsa, departamenttiń arnaıy tapsyrmalar jónindegi aǵa ınspektory Baqytjan Qorǵashev polıtsııada 8 jyldan astam ýaqyt qyzmet etip keledi. Kásibı merekege oraı jáne quqyq tártibin nyǵaıtýǵa qosqan zor úlesteri úshin joǵaryda atalǵan qyzmetkerler podpolkovnık shenin merziminen buryn alyp, kólik polıtsııasynyń eń úzdik qyzmetkerleri ataldy.
Іs - shara sońynda jınalǵandarǵa qyzmettik mindetin oryndaý kezinde qaza tapqan qyzmetkerlerge arnalǵan «Er esimi-el esinde» atty fılm kórsetildi.
