Nur-Sultanda kóktemgi sý tasqynyna daıyndyq qalaı júrip jatyr

NUR-SULTAN. QazAqparat - Elorda ákiminiń orynbasary Ermek Qızatovtyń tóraǵalyǵymen Tótenshe jaǵdaılardyń aldyn alý jáne joıý jónindegi komıssııanyń jospardan tys otyrysy ótti. Bul týraly QazAqparat qala ákimdiginiń resmı saıtyna silteme jasap habarlaıdy.

Jıyn barysynda Nur-Sultan qalasy jáne qala aýmaǵynda kóktemgi tasqyn sýǵa daıyndyq boıynsha Nur-Sultan qalasy TJ departamenti bastyǵynyń orynbasary polkovnık Esen Baıyrov aǵymdaǵy jaǵdaıdan habardar etti.

Nur-Sultan qalasy boıynsha 2021 jylǵy sý tasqyny kezeńinde aýdan ákimdikterimen birlesip 29 sý tasqyny qaýpi bar ýchaske anyqtaldy: Almaty aýdany boıynsha – 7 ýchaske, Baıqońyr aýdany boıynsha – 8 ýchaske, Esil aýdany boıynsha – 9 ýchaske, Saryarqa aýdany boıynsha – 5 ýchaske.
Azamattyq qorǵaý organdarynyń toby, sondaı-aq qalanyń kommýnaldyq qyzmeti turaqty daıyndyq júıesine yńǵaılandy.

TJ joıýǵa arnalǵan is-qımyl jospary jáne 2021 jyly Nur-Sultan qalasynyń aýmaǵynda sý tasqyny kezeńindegi tótenshe jaǵdaılardyń aldyn alý jónindegi keshendi jospar bekitildi.

Josparlanǵan is-shara sheńberinde «Kóktem 2021» RKShO aýmaqtyq memlekettik azamattyq qorǵaý júıesiniń daıyndyǵyna tekserý júrgiziledi.

Kún tártibinde Nur-Sultan qalasynyń aýmaǵynda kóktemgi tasqyn sýlardy ótkizýdiń aǵymdaǵy jaı-kúıi jáne oǵan daıyndyq máselesi talqylandy.

Atalmysh máseleni qarastyrý kezinde qala aýmaǵynan tasqyn sýlardy qaýipsiz ótkizý, gıdrotehnıkalyq qurylystardyń qaýipsiz jumys rejımi, qorǵanys bógetterin ustaý jáne sý basý qaýpi bar ýchaskelerde tasqynǵa qarsy sharalar ótkizýge erekshe nazar aýdaryldy.

Kún tártibin qaraý nátıjeleri boıynsha qala qyzmetterine tótenshe jaǵdaılardyń aldyn alýǵa jáne azamattyq qorǵaýdyń aýmaqtyq kishi júıesiniń turaqty jumys isteýine baǵyttalǵan naqty tapsyrmalar berildi.