Nur-Sultanda qoǵamdyq tártip 16 myń kamera arqyly qadaǵalanady
«Jyl basynan bastap iKOMEK109 qalalyq ortalyǵyna 661 myńnan astam ótinish kelip túsken. Turǵyndardy negizinen densaýlyq saqtaý, qoǵamdyq kólik, abattandyrý jáne basqa da máseleler alańdatady», - dep habarlady ortalyqtyń baspasóz qyzmeti.
iKOMEK109 sıtýatsııalyq ortalyǵy 16 myńnan astam ıntegratsııalanǵan beınebaqylaý kamerasy arqyly qala turǵyndarynyń qaýipsizdigi men jaıly turmysyna táýlik boıy monıtorıng júrgizip otyr.
«Beınebaqylaý júıesi arqyly ınspektorlar qala kósheleriniń qardan tazartylmaýy, sý basý, qoqystyń der kezinde jınalmaýy sııaqty faktilerdi tirkep, polıtsııa departamentiniń qyzmetkerlerimen birge quqyqtyq tártipti qadaǵalaıdy. Qalalyq monıtorıng jáne jedel áreket etý ortalyǵynyń qardy ýaqytyly shyǵarýyn baqylaý jáne monıtorıngileý arqasynda kommýnaldyq qyzmetter qala aýmaǵy men turǵyn alaptardan qardy ýaqytyly jınap, shyǵaryp otyr», - deıdi iKOMEK109 ortalyǵynyń basshysy Jannat Dúbirova.
Beınebaqylaý kameralary arqyly joldar men aýlalarda sý basqan ýchaskeler anyqtalǵan jaǵdaıda, sý basqan jerge jedel tártippen sý aıdaıtyn tehnıka jiberiledi. Osy sııaqty keleńsizdikke kýá bolǵan astanalyqtar iKOMEK109 biryńǵaı baılanys ortalyǵynyń 109 nómirine qońyraý shalyp, málimet berýine bolady.
Eske salaıyq, Óskemende joǵalǵan 10 jasar bala beınebaqylaý kameralary arqyly tabylǵan bolatyn.