Nur-Sultanda qoǵamdyq orynda jasalatyn qylmys sany 2 ese azaıdy
NUR-SULTAN. QazAqparat - Ótken jyly Nur-Sultan qalasynyń qoǵamdyq oryndarynda jasalǵan quqyq buzý faktileriniń sany 44,9 % azaıǵan. Bul týraly qala ákiminiń orynbasary Malıka Bekturova óziniń Telegram kanalynda málim etti, dep habarlaıdy QazAqparat.
«Eger 2018 jyly qalanyń qoǵamdyq oryndarynda 14 myńnan astam quqyq buzýshylyq jasalsa, 2019 jyly bul kórsetkish 8 myńǵa deıin azaıǵan. Onyń ishinde, qala kóshelerinde jasalǵan qylmystar 38,4 % azaıdy. Buzaqylyq áreketter sany 52,3 % - ǵa qysqardy», - deıdi Malıka Bekturova.
Onyń aıtýynsha, búgingi tańda astanada «Sergek» qoǵamdyq jáne jol qaýipsizdigi jobasy boıynsha 13 myń kamera ornatyldy. Onyń ishinde 10 myńy qaladaǵy qoǵamdyq tártipti qadaǵalaıdy.
«Bul kameralardyń derekteri qaladaǵy kóshelerde bolyp jatqan jaǵdaıdy polıtsııa qyzmetkerleri baqylaıtyn Ahýal ortalyǵyna beriledi. Jol qıylystarynda jáne joldyń jelilik ýchaskelerinde ornatylǵan apparattyq-baǵdarlamalyq keshenderdiń quramyna kiretin sholý kameralary da astanada qoǵamdyq qaýipsizdikti baqylaýǵa múmkindik beredi. Kameralar qalanyń jatyn aýdandarynda, mektepterdiń janynda, qoǵamdyq oryndarda ornalasqan» dep jazady qala ákiminiń orynbasary.
Sondaı-aq, mektepterde, balabaqshalarda, qoǵamdyq oryndar aýmaǵynda astanadaǵy qaýipsizdik deńgeıin arttyrý maqsatynda menshikti kameralardy ıntegratsııalaý júrgizilip jatyr.
