Nur-Sultanda qoǵamdyq kólik jolaýshylary 30 paıyzǵa azaıdy
NUR-SULTAN. QazAqparat - Elordada qoǵamdyq kólik jolaýshylary 30 paıyzǵa azaıdy. Bul týraly Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Tótenshe jaǵdaıdyń jarııalanýyna baılanysty kúndelikti jolaýshylar aǵynynyń ortasha eseppen alǵanda sońǵy 2 kúnniń ishinde 30 paıyzdan astamǵa tómendeýi baıqalady. Elordanyń avtobýs parkterinde aldyn alý sharalary júrgizilip jatyr. Onyń ishinde avtobýstardyń salonyn sońǵy aıaldamada jáne baǵdardyń júrý ýaqytynyń sońynda zararsyzdandyrý, júrgizýshilerdiń dene qyzýyn ólsheý jáne medıtsınalyq tekserý kezinde kúndelikti nusqaýlyqtan ótkizý bar. Avtobýs júrgizýshilerine maskalar berildi», - dedi Altaı Kólginov.
Onyń aıtýynsha, Memleket basshysynyń tapsyrmasyna sáıkes, shaǵyn jáne orta bıznesti qoldaý boıynsha Úkimet tısti sharalardy qabyldady.
«Bizde medıtsınalyq ortalyqtar, qyzmetkerlerimiz joǵary deńgeıde qyzmet kórsetýde. Ár azamat ózi men otbasyn qorǵaý úshin sala mamandarynyń nusqaýlyqtaryna qulaq asyp, tártipti, jeke tazalyǵyn saqtaý qajet. Prezıdentimiz aıtqandaı, biz bul indetti kúreste birlikpen ǵana jeńe alamyz», - dedi qala basshysy.
