Nur-Sultanda qoǵamdyq kólik balalarǵa tegin qyzmet kórsetip bastaǵanyna bir jyl toldy
NUR-SULTAN. QazAqparat – Nur-Sultanda qoǵamdyq kólikterdiń balalar úshin tegin qyzmet kórsetkenine týra bir jyl boldy. Elorda ákimi Altaı Kólginovtiń tapsyrmasy boıynsha barlyq kámeletke tolmaǵandar úshin jeńildetilgen jol júrý aqysy 2020 jyldyń naýryz aıynda iske qosyldy. Osylaısha tegin jol júrý engizilgen sátten bastap balalar 7 mln 600 myńǵa jýyq sapar jasady, dep habarlaıdy qalalyq ákimdiktiń baspasóz qyzmeti.
«Týra bir jyl buryn Nur-Sultan qalasynyń ákimi Altaı Kólginovtiń tapsyrmasy boıynsha barlyq kámeletke tolmaǵan balalarǵa olardyń mártebesine qaramastan tegin jol júrý engizilgen bolatyn. Bul sheshim qala mańynda turatyn balalarǵa da qatysty. Bul shara karantınge deıin engizilgen bolatyn.
Jol júrý úshin mektep kólik kartasynyń bolýy, ony avtobýsta valıdatsııalaý mindetti shart bolyp sanalady. Bul jolaýshylar aǵynyn qadaǵalaýǵa jáne basym baǵyttardy anyqtaýǵa múmkindik beredi. Jeti jasqa deıingi balalarǵa kólik kartasy qajet emes», — dep atap ótti «City Transportation Systems» JShS Basqarma tóraǵasy Bekmyrza Igenberdınov.
Bir jyl ishinde balalar úshin 40 myńǵa jýyq mektep kólik kartasy shyǵaryldy, onyń ishinde 7 myńnan astamy – bıyl.
Qazirgi ýaqytta tegin jol júrýdi UOS qatysýshylary men múgedekteri jáne olarǵa teńestirilgen adamdar, zeınetkerler, sondaı-aq zeınetkerlik jasqa tolǵan jasyna baılanysty jáne asyraýshysynan aıyrylý jaǵdaıy boıynsha memlekettik áleýmettik járdemaqy alýshylar, kópbalaly analar, kópbalaly otbasylar, múgedekter, 18 jasqa deıingi múgedek balalar, onyń ishinde ata-anasynyń (zańdy ókilderiniń) biri paıdalanady.
Mektep kólik kartasyn rásimdeýge ótinimdi R.Qoshqarbaev dańǵyly, 50/1 mekenjaıyndaǵy ortalyq kassa arqyly alýǵa nemese transcard.kz onlaın saıty arqyly úıge tapsyrys berýge bolady.
«Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańǵa sáıkes árbir óńir men jergilikti atqarýshy organ óz bıýdjetin derbes qalyptastyrady jáne jeńildikterdi aıqyndaıdy. Sondyqtan City Transportation Systems (CTS) marshrýttarymen tegin jol júrý elordada jáne onyń qala mańyndaǵy aýdandarda turatyn, oqıtyn 18 jasqa deıingi balalarǵa ǵana beriledi.
