Nur-Sultanda kisi tonaǵandar «Iphone tabý» qosymshasy arqyly qolǵa tústi

NUR-SULTAN. QazAqparat – Túngi ýaqytta 19 jastaǵy elordalyq polıtsııaǵa habarlasyp, buzaqylardyń 230 myń teńge turatyn «iPhone 7» markaly telefonyn alyp ketkenin málimdegen, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Jigittiń aıtýynsha, ol keshke kezdesýden qaıtyp kele jatqan. Kravtsov kóshesiniń boıyndaǵy zırattardyń janynda oǵan eki jigit kelip, telefonyn berýdi talap etken. Ol berýden bas tartqan. Alaıda buzaqylar jigitti uryp, onyń «iPhone 7» markaly telefony men qulaqqabyn alyp, jasyrynǵan.

Jedel-izdestirý sharalary kezinde mobıldi qosymsha arqyly telefonnyń qaı jerde ekeni anyqtaldy. Telefondy urlaǵan eki jigit te sol jerde bolǵan. Kúdiktiler ustalyp, Polıtsııa departamentiniń ýaqytsha ustaý ızolıatoryna qamaldy.

Telefon ıesine qaıtaryldy.

Atalmysh fakti boıynsha qylmystyq is qozǵaldy, ustalǵandardyń qala aýmaǵynda buryn jasalǵan uqsas qylmystarǵa qatysy bar-joǵy anyqtalýda.