Nur-Sultanda kıbesporttan Dúnıejúzilik oıyndardyń irikteý kezeńi ótti
NUR-SULTAN. QazAqparat – Elordadaǵy Jekpe-jek saraıynda kıbersporttan «World Electronic Sports Games - 2019: Kazakhstan» iri týrnıri ótti. Bul týraly «SPORTINFORM» agenttigi Qazaqstan QCF kıbersport federatsııasynyń baspasóz qyzmetine silteme jasap habarlaıdy.
Sportshylar tórt dıstsıplına - «Counter-Strike: Global Offensive», «Dota 2», «StarCraft II» jáne «Pro Evolution Soccer 2020» boıynsha baq synady. Týrnırdi tamashalaý úshin eki myńnan astam kórermen jınaldy. Ol bas seriktes «Samruq Qazyna» AQ-nyń, QR Mádenıet jáne sport mınıstrliginiń, Nur-Sultan qalasy ákimdiginiń, «Qazaqtelekom» AQ men QR Jaýyngerlik óner qaýymdastyǵynyń qoldaýymen ótti.
«Qazirgi tańda kıbersport damyp keledi. Sportshylardyń jasy 14 pen 25 aralyǵyn quraıdy. Búginde mıllıondaǵan kórermen kıbersportqa qoldaý kórsetip otyr. Bul – álemdik trend. Sizderdi osyndaı aıtýly oqıǵamen quttyqtap, sáttilik tilegim keledi. Mereke qutty bolsyn!», - dedi WESG-2019 qatysýshylaryna elorda ákimi Altaı Kólginov.
Qazaqstan kıbersport federatsııasynyń prezıdenti Qýanyshbek Esekeev kórermenderge erekshe belsendilik pen qyzyǵýshylyq tanytqandary úshin alǵys bildirdi.
«WESG-2019: Kazakhstan» týrnıriniń ulttyq kezeńininiń jeńimpazdary qarasha aıynda Almatyda ótetin World Electronic Sports Games Ortalyq Azııa týrnırinde Qazaqstan namysyn qorǵaıdy. Ortalyq Azııa kezeńinen keıin qatysýshylar Qytaıda ótetin kıbersport boıynsha WESG-2020 halyqaralyq chempıonatynda synǵa túsedi. Atalmysh týrnır Alibaba korporatsııasynyń sporttyq bólimshesi bolyp tabylatyn Alisports kompanııasy uıymdastyrǵan jahandyq kıbersporttaǵy asa mańyzdy ári iri sharalardyń biri ekenin atap ketý kerek.
