Nur-Sultanda keshki júgirýge shyqqan áıeldi zorlamaq bolǵan er adam ustaldy
NUR-SULTAN. QazAqparat – Nur-Sultanda keshki júgirýge shyqqan áıeldi zorlamaq bolǵan er adam ustaldy. Elordalyq polıtseıler kúdiktini izin sýytpaı qolǵa túsirdi. Bul týraly QazAqparat qalalyq Polıtsııa departamentine silteme jasap habarlaıdy.
Saǵat 19:34-te «102» arnasyna jas jigittiń áıeldi zorlaýǵa tyrysqany jáne onyń belgisiz baǵytqa qashyp ketkeni týraly habarlama túsken.
Mán-jaıdy tekserý barysynda 42 jastaǵy áıeldiń B.Momyshuly kóshesiniń boıymen júgirýge shyqqany jáne onyń sońynan ergen kúdikti er adamdy baıqaǵany anyqtaldy. Jábirlenýshiniń aıtýynsha, onyń qolynda eki paket bolǵan. Keıin belgili bolǵandaı, kúdikti óz oıyn iske asyrǵasyn kıimin aýystyryp, jasyrynýdy oılaǵan.
Qaskúnem alkogoldi ishimdikke mas kúıinde áıeldi qýyp jetken jáne ony jerge qulatyp, dóreki kúsh qoldanǵan. Kóshedegi kezdeısoq jolaýshylar áıeldiń aıqaıyn estip, kómekke kelgen. Olardy kórgen qylmysker qashyp úlgergen.
«102» arnasyna aqparat kelip túsken soń, qaskúnemdi ustaýǵa polıtsııa departamentiniń jeke quramy jiberildi jáne kúdikti izin sýytpaı ustaldy. Ol turaqty jumysy joq, 20 jastaǵy jigit bolyp shyqty. Áıel ony tanydy.
Atalǵan fakti boıynsha qylmystyq is qozǵalyp, tergeý amaldary júrgizilýde. Kúdikti ýaqytsha ustaý ızolıatoryna qamaldy.
