Nur-Sultanda kelinshek áleýmettik jelide tanysqan er adamdy tonap ketti
Urlyq faktisi boıynsha polıtsııaǵa 59 jastaǵy er adam júgingen. Ol «Drýg vokrýg» mobıldi qosymshasy arqyly 46 jastaǵy kelinshekpen tanysqanyn habarlady. Onlaın tanystyqtan keıin kelinshek onymen kezdeskisi kelgen. Ári qaraı tanystyq jaldamaly páterde jalǵasqan. Páter ishinde er adam jýynýǵa ketkende, kelinshek onyń kúrteshesiniń qaltasynan 125 myń teńge kóleminde aqshany urlap, izin sýytqan.
Krımınaldyq polıtsııa qyzmetkerleri jedel izdestirý sharalaryn júrgizý kezinde kúdikti áıeldi ustady. Kelinshek óz kinásin moıyndady. Onyń elorda aýmaǵynda osyǵan uqsas qylmystarǵa qatysy bar-joǵy anyqtalýda. Atalǵan fakti boıynsha qylmystyq is qozǵaldy. Áıel jábirlenýshige urlanǵan qarajatty qaıtardy.
Nur-Sultan qalasy Polıtsııa departamenti azamattardy abaı bolýǵa shaqyrady, jaqyn tanys emes adamdarǵa senbeýge jáne baǵaly zattardy qaraýsyz qaldyrmaýǵa keńes beredi.