Nur-Sultanda kelesi aptada qandaı mádenı sharalar ótedi
NUR-SULTAN. QazAqparat - Kelesi aptada elimizde birneshe mańyzdy kún atalyp ótedi. Naqtyraq aıtqanda, 31 mamyr – Saıası qýǵyn-súrgin jáne asharshylyq qurbandaryn eske alý kúni, 1 maýsym – Halyqaralyq balalardy qorǵaý kúni, al 4 maýsym – QR Memlekettik rámizder kúni. Elordada osy datalarǵa oraı is-sharalar, kórmeler, kontsertter ótedi, dep habarlaıdy QazAqparat.
Elorda ákimdiginen málim etkendeı, sharalardyń deni onlaın formatta uıymdastyrylady.
Atap aıtqanda, Saıası qýǵyn-súrgin jáne asharshylyq qurbandaryn eske alý kúni «ALJIR» murajaı-memorıaldyq kesheni «Aljırdiń biregeı eksponattary» atty onlaın-kórmesin ótkizedi. Onda Sankt-Peterbýrg, Ierýsalım, Tel-Avıv, Tbılısı, Almaty qalalary boıynsha zertteý ekspedıtsııalary barysynda jınalǵan materıaldar usynylady.
Sol kúni mýzeıdiń áleýmettik jelilerdegi paraqshasynda saıası qýǵyn-súrgin jáne totalıtarızm qurbandaryn eske alý memorıalyna jáne «1932-1933 jyldardaǵy asharshylyq qurbandaryna taǵzym» monýmentine gúl shoqtaryn qoıý rásimin kórýge bolady.
Birneshe saǵattan keıin murajaı ǵımaratynda Eýropalyq keńes pen «ALJIR» murajaıy uıymdastyrǵan «Totalıtarızm qurbandaryn eske alý – Eýroodaq pen Qazaqstan arasynda jańa kópir salý» taqyrybynda dóńgelek ústel otyrysy ótedi.
Halyqaralyq balalardy qorǵaý kúnine oraı «ALJIR» murajaıy «Karlag týraly aqıqat» atty onlaın-kórmesin uıymdastyrady. Sondaı-aq, 1-3 maýsym aralyǵynda «Karlag balalary» týraly dáris ótkizedi. 4 maýsymda Qazaqstan Respýblıkasynyń Memlekettik rámizder kúnine oraı murajaıda «Birlik pen beıbitshilik nyshandary» vırtýaldy kórmesi, al 4 jáne 5 maýsymda «Memlekettik rámizder – elimizdiń nyshany» dárisi ótedi.
Balalardy qorǵaý kúnine oraı, 1 maýsym kúni saǵat 15:00-de «Naz» memlekettik bı teatry «Baqytty bolsyn balalar» kontserttik baǵdarlamasyn usynady.
Nur-Sultan ákimdiginiń ortalyqtandyrylǵan kitaphanalar júıesi de ataýly kúnderden tys qalmaıdy. Máselen, 31 mamyrda Mıchýrıno turǵyn alabyndaǵy №10 buqaralyq kitaphanada, sondaı-aq №2 balalar kitaphanasynda Saıası qýǵyn-súrgin jáne asharshylyq qurbandaryn eske alyp, slaıdtar men kórme stendteri barysynda ótken ǵasyrdyń zobalań jyldary bolǵan oqıǵalar týraly aıtylady.
1 maýsymda qalalyq kitaphanalarda balalarǵa arnalǵan oıyn baǵdarlamalaryn, saıystar, vıktorınalar, erteńgilikter ótkizý josparlanyp otyr.
1 maýsym kúni saǵat 19:00-de Nur-Sultan qalasynyń Memlekettik akademııalyq fılarmonııasy Ǵ.Jubanova atyndaǵy ishekti aspaptar kvartetiniń «Pod znakom Bely Bartoka» kontsertine shaqyrady.
4 maýsymda fılarmonııa QR Memlekettik rámizder kúnine arnalǵan «Jelbiregen kók týym» klassıkalyq jáne estradalyq vokal bóliminiń kontsertin uıymdastyrady.
5 maýsym kúni tańerteń «Astana» kontsert zalynyń sahnasynda Qazaqstan Respýblıkasy Táýelsizdiginiń 30 jyldyǵyna arnalǵan «JANA TOLKYN» balalar men jasóspirimder shyǵarmashylyǵynyń I respýblıkalyq baıqaýy ótedi.
1 maýsym kúni saǵat 11:00-de Astanalyq tsırk Instagram-daǵy resmı akkaýntynda (Astanalyqtsirk) tsırk ártisteriniń ónerin onlaın usynady. Al eki saǵattan keıin tsırk «Detı solntsa» sharasyn tikeleı efırde ótkizedi.
Aıta ketý kerek, is-sharalardyń barlyǵy sanıtarlyq normalardy saqtaı otyryp ótkiziledi.
