Nur-Sultanda qajet kezde kóliktiń nómirin jasyratyn qurylǵy ornatyp alǵan júrgizýshi ustaldy
NUR-SULTAN. QazAqparat – Nur-Sultanda polıtsııa qyzmetkerleri kóligine qajet kezde nómirdi jasyratyn qurylǵy ornatyp alǵan júrgizýshini ustady, dep habarlaıdy QazAqparat.
Astana qalalyq Polıtsııa departamentiń baspasóz qyzmetiniń habarlaýynsha, tártip saqshylary joldaǵy kezekshili barysynda jalǵan nómirmen júrgen eki júrgizýshini ustady. Olar Qabanbaı batyr dańǵylynyń boıynda áýejaı jaǵynan aınalma jolmen kele jatqan «Toıota Mark 2» markaly avtokólikti toqtatqan. Tekserý kezinde júrgizýshiniń kólikte qajet bolǵan jaǵdaıda memlekettik nómirdi jasyra alatyn qurylǵyny paıdalanǵany anyqtaldy.
Memlekettik tirkeý nómiri belgilerin sáıkestendirýge kedergi keltiretin arnaıy qurylǵylardy paıdalanyp, kólik quralyn basqarǵany úshin QR ÁQBtK-niń 590-baby 4-bóligi boıynsha ákimshilik hattamalar toltyryldy.
«Sot sheshimimen júrgizýshilerge 20 AEK kóleminde aıyppul salynady nemese bir jyl merzimge kólik quraldaryn basqarý quqyǵynan aıyrý jazasy qarastyrylǵan. Tártip buzýshylardyń avtokólikteri kommýnaldyq avtoturaqqa qoıyldy»,-delingen baspasóz habarlamasynda.
Baspasóz qyzmetiniń málimetterine qaraǵanda, tártip saqshylary jedel aldyn alý is-sharasy barysynda jolaýshylardy zańsyz tasymaldaýdyń 8 faktisin anyqtaǵan. Sondaı-aq zańsyz tasymaldaýmen aınalysqan Ózbekstan jáne Tájikstan Respýblıkasynyń azamattaryn ustady. Júrgizýshiler jolaýshylardy «Yandex» mobıldi qosymshasy arqyly tıisti tirkeý qujattarynsyz tasymaldaǵan. Sheteldikterge qatysty QR ÁQBtK-niń 436-baby boıynsha ákimshilik hattamalar toltyrylyp, avtokólikter kommýnaldyq turaqqa ornalastyryldy.
Aıta keteıik, elordada 19 shildeden bastap jol qaýipsizdigin qamtamasyz etý maqsatynda «Qaýipsiz jol» jedel-aldyn alý is-sharasy ótip jatyr. Onyń barysynda myńnan astam jol qozǵalysy erejesin buzý faktisi anyqtaldy, onyń ishinde 9 júrgizýshi qarsy qozǵalys jolaǵyna shyqqany úshin, 2 júrgizýshi mas kúıinde kólik basqarǵany úshin ustaldy.
Jaıaý júrginshiler ótkelinen adamdardy ótkizbegeni úshin 21 júrgizýshi, apatty jaǵdaı týdyrǵany úshin 9 júrgizýshi jáne 32 júrgizýshi baǵdarshamnyń tyıym salatyn sıgnalyna ótkeni úshin jaýapqa tartyldy. Sonymen qatar «Qorǵaý» mobıldi qosymshasynyń kómegimen 146-ǵa jýyq júrgizýshi ákimshilik quqyq buzýshylyq boıynsha bereshekteri bar ekeni týraly habarlandy. Nur-Sultan qalasynyń kommýnaldyq turaǵyna 33 avtokólik ornalastyryldy.
