Nur-Sultanda «Qazaqstan arýy» ulttyq baıqaýynyń fınaly ótedi
Bıylǵy «Qazaqstan arýy» ulttyq baıqaýynyń arnaıy jobasy boıynsha QR Mádenıet jáne sport mınıstrliginiń qoldaýymen tanymdyq rolıkter jıyntyǵy jasalady. Bul kórkem, qysqa fılmderde óńirlik týrdyń jeńimpazdary óz óńiriniń týrıstik múmkindikterin kórsetedi.
Mysaly, «Óskemen arýy» biregeı Rahman qaınary týraly, «Aqtóbe arýy» «Úıtas» tabıǵı eskertkishi jaıly, «Shymkent arýy» «Aq meshit» úńgiri týraly áńgimelep beredi...
Qyzdar óziniń týǵan óńirleriniń kórnekti jerlerin bar meıirimmen ári maqtanyshpen tanystyrady, erekshe tabıǵı jáne arheologııalyq nysandardy óz kózderimen kórip, tamashalaý úshin saıahatshylardy ózderiniń týǵan óńirlerine shaqyrady.
«Qazaqstan arýy - 2019» ulttyq baıqaýy - ımıdjdik sharalardyń biri bolǵaly tur. «Qazaq týrızm» - ulttyq brend-menedjer retinde elimizde ótip jatqan aýqymdy sharalardy úılestirip, týrızmge paıdaly bolýyn oılastyrady. Máselen, elordada jyl saıyn ótkiziletin Astana ekonomıkalyq forýmy, álbette, aıasy men keletin yqpaldy adamdary turǵysynan óte aýqymdy shara. Ol yqpaldy adamdardyń sózderi álemniń úzdik ondaǵan telearnalarynda beriledi. Biraq, ókinishke oraı, AEF-te jahandyq máseleler kóterilgenimen, Qazaqstandy týrıstik turǵyda jarnamalaý joq. Biz endigi kezekte árbir osyndaı sharany qaıta formattap, óz kontentimizdi kórsetip, Qazaqstannyń kórikti jerlerin bir kórsetip qalýǵa tyrysatyn bolamyz», - deıdi «Spýtnık Qazaqstan» baspasóz ortalyǵynda ótken brıfıng barysynda «Qazaq týrızm» ulttyq kompanııasy tóraǵasynyń orynbasary Tımýr Dúısenǵalıev.
Jańa format aıasynda «Dúnıejúzi arýy» jáne «Álem arýy» sııaqty iri álemdik baıqaýlarǵa arnalǵan tanystyrylym rolıkteri túsiriledi. Bul rette rolıkter Uly dalanyń kıeli jerlerine, Qazaqstan Respýblıkasynyń biregeı geografııalyq jáne tabıǵı landshafttaryna arnalmaq. Ulttyq kompanııa osy halyqaralyq jobalardaǵy medıa alańdardyń joǵary reıtıngisi arqyly yqtımal týrısterdiń barynsha aýqymdy aýdıtorııasyn tartýdy kózdeıdi.
