Nur-Sultanda qatty turmystyq qaldyqty qaıta óńdeý deńgeıi 70% jetedi
NUR-SULTAN. QazAqparat – Nur-Sultan qalasy Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Ábdimanap Jumadildaev qatty turmystyq qaldyqtardy qaıta óńdeý boıynsha qandaı jumys júrgizilip jatqanyn aıtyp berdi, dep habarlaıdy QazAqparat.
«Qaıta óńdeý boıynsha 2018-2020 jyldarǵa arnalǵan Qorshaǵan ortany qorǵaýdyń keshendi josparyn oryndaý aıasynda «Operator ROP» JShS-men birlesip kóptegen jumystar atqarylýda. Bıyl baǵdarlama aıaqtalady jáne biz 2025 jylǵa deıingi jospardy maquldaımyz», - dedi Á. Jumadildaev elordada ótip jatqan «Saryǵa tasta!» ekologııalyq aktsııasynda.
Spıker qalanyń barlyq turǵyndarynyń qoqys suryptaý erejelerin saqtamaıtynyn jáne ekologııalyq mádenıetti qalaı sińirý qajettigin aıtyp berdi.
«Halyqaralyq tájirıbe kórsetkendeı, óńdeýge bolatyn qoqystyń barlyǵyn qaıta paıdalanýymyz kerek. Sondyqtan úgit-nasıhat jumystaryn júrgizý óte mańyzdy. Iıa, biz áli mentalıtet jasaı almadyq. Bul ýaqyt pen sanany qajet etedi. Sondyqtan mektepterde, kolledjderde jáne ýnıversıtetterde nasıhattaý jumysy júrip jatyr. Ekologııalyq saǵattar ótkiziledi, muǵalimder arnaıy daıyndyqtan ótedi. Eń aldymen, árıne, ózimizden bastaý kerek», - dedi ol.
Onyń aıtýynsha, Nur Sultanda arnaıy konteınerler ornatý jumystary jalǵasady.
«Qala ósken saıyn konteınerler de kóbeıedi. Osyǵan baılanysty, «ROP» JShS kómektesip, salaǵa ınvestıtsııa quıyp keledi, konteınerlerdi satyp alý boıynsha jumys isteıdi. Barlyǵy keste boıynsha, júıeli júrgiziledi. Bizde qoqysty qaıta óńdeý kesheni bar. Aralasyp kelgen qoqystar qolmen suryptalady, shyny, metall, qaǵaz, plastık alynady. Qalǵany syǵymdalyp, arnaıy polıgondarǵa tasymaldanady. Bir kezderi turmystyq qatty qaldyqtardy óńdeý deńgeıi 3% quraıtyn. Ótken jylmen salystyrǵanda biz 2018 jyly bul kórsetkishti 16% jetkizdik. Bizdiń maqsatymyz – qaıta óńdeý úlesin 70% jetkizý. Osyǵan baılanysty úlken ınvestıtsııa qajet», - dedi Ábdimanap Jumadildaev.
Aıta keteıik, elordada qatty turmystyq qaldyqtardy bólip tastaýdy nasıhattaýǵa arnalǵan «Saryǵa tasta» ekologııalyq aktsııasy ótti.
