Nur-Sultanda karantın tártibi 144 ret buzylǵan
NUR-SULTAN. QazAqparat - Tártip saqshylary, epıdemıologtar, eriktiler, jergilikti atqarýshy organdardyń ókilderi karantın rejımin buzý áreketterin anyqtaý boıynsha reıdtik sharalardy jalǵastyrýda, dep habarlaıdy elorda ákimdiginiń resmı saıty.
«Nur-Sultan qalasynda 5 shildeden bastap mobıldi toptar karantın tártibin buzýdyń – 76 jaǵdaıyn, polıtsııanyń birikken kúshteri – 68 jaǵdaıyn anyqtaldy. Ereje buzý týraly materıaldar densaýlyq saqtaý salasynyń jergilikti atqarýshy organy – taýarlar sapasy men qaýipsizdigin baqylaý departamentine berildi», – dep habarlady qalalyq polıtsııa departamenti.
Qazirgi ýaqytta monıtorıngtik mobıldi toptardyń sany - 8. Olarda 49 adam, onyń ishinde polıtsııa, taýarlardyń sapasy men qaýipsizdigin baqylaý departamenti, jergilikti atqarýshy organdardyń qyzmetkerleri men eriktiler bar. Nur-Sultan qalalyq polıtsııa departamenti azamattardy qoǵamdyq oryndarda jaýapkershilik tanytyp, sanıtarlyq normalardy saqtaýǵa, sondaı-aq karantın sharalary kezinde polıtsııa qyzmetkerleriniń talaptaryna túsinistik tanytýǵa shaqyrady.
Іndettiń taralýynyń aldyn alý maqsatynda polıtsııa men volonterler karantın rejımin saqtaý jáne jeke qorǵanys quraldaryn paıdalaný qajettigi týraly turǵyndarmen profılaktıkalyq túsindirý jumystaryn júrgizedi. Sonymen qatar polıtsııa oıyn-saýyq, qoǵamdyq tamaqtaný oryndary, monshalar, saýnalar, attraktsıondarǵa baryp, olardyń ıelerine qoldanystaǵy karantın sharalary týraly eskertti. Quqyq buzýshylar qoldanystaǵy zańnamaǵa sáıkes jaýapqa tartylady.
