Nur-Sultanda karantın talaptaryn buzǵan oıyn-saýyq oryndary anyqtaldy

NUR-SULTAN. QazAqparat - Sanıtarııa normalaryn saqtamaǵan kafeler men meıramhanalardyń ıelerine kóp mólsherde aıyppul salynady, dep habarlaıdy QazAqparat elorda ákimdiginiń resmı saıtyna silteme jasap.

Polıtseıler men Nur-Sultan qalasy ákimdiginiń mobıldi toby karantın tártibin buzýshylardy anyqtaý boıynsha kezekti reıd júrgizdi. Birqatar mekemelerde sanıtarııa erejeleri saqtalmaıtyny anyqtaldy. Solardyń biri – Turan dańǵyly, 2 meken-jaıynda ornalasqan «Aýra» kafesi. «Jazǵy terrassada qoıylǵan 15 ústeldiń barlyǵynda kelýshiler boldy. Olardyń arasynda qashyqtyq saqtalmaǵan. Kafe ishindegi karaokeniń eki kabınasynda da adamdar boldy. Maska taǵý tártibi saqtalmaǵan. Jarlyqqa sáıkes jumys ýaqyty 22:00-ge deıin bolsa da, kafe saǵat 23:00-de áli jumys jasap tur», – deıdi Nur-Sultan ákimdiginiń azamattyq qorǵanysty qamtamasyz etý ortalyǵynyń bas mamany Jeńis Kamalıev. Mekeme ıelerinen jazbasha túsinikteme alyndy. «Atalǵan fakti boıynsha jergilikti polıtsııa qyzmetkerleri aýdandyq SES basqarmasyna habarlama jiberdi. «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» baby boıynsha tıisti sharalar qabyldanady», – dedi mobıldi toptardyń úılestirýshisi Aman Ospanov. Baptyń sanktsııalary úlken aıyppul salýdy qarastyrady. Jaýapty tulǵalar bıznes ıeleri men kelýshilerdi barlyq qoǵamdyq oryndarda sanıtarııa normalaryn qatań saqtaýǵa shaqyrady: sanıtaızerlerdi qoldanyp, maska taǵý, qashyqtyq saqtaý kerek.

Aıta keteıik, ótken aptada Nur-Sultanda polıtsııa qyzmetkerleri, epıdemıologtar, eriktiler, jergilikti atqarýshy organdardyń ókilderinen turatyn mobıldi toptar 227 karantın tártibin buzýshylyqty anyqtady. Onyń ishinde maska taǵý jáne áleýmettik qashyqtyq saqtaýdyń mindetti talaptaryn buzý – 146 bolsa, tyıym salynǵan ýaqytta qyzmetin júzege asyrǵan 81 kásipkerlik sýbekti karantın talaptaryn buzǵan.