Nur-Sultanda karantın sharalaryn engizgeli mobıldi toptar júktemesi 30% tómendedi
NUR-SULTAN. QazAqparat - Elorda turǵyndary úı jaǵdaıynda sapaly medıtsınalyq kómek alýda. Esterińizge sala keteıik, pandemııa kezinde arnaıy mobıldi toptar qurylǵan bolatyn. Olardyń quramynda feldsher men medbıke jumys isteıdi, dep habarlaıdy QazAqparat qala ákimdiginiń baspasóz qyzmetine silteme jasap.
«Mobıldi toptar shaqyrtýlarǵa baryp, koronavırýs ınfektsııasynyń belgilerin baıqasa, bizdiń feldsherler úıden PTR-zertteý úshin qan alady. Sondaı-aq COVID-19-ben aýyrǵan otbasy múshelerinen synama alynady. Osylaısha olardyń emhanaǵa kelýin azaıtyp, qaýipsizdigin saqtaı alamyz», – deıdi bas medbıke Kúlzı Ábenova. Dárigerler úıde kórsetetin medıtsınalyq kómekten basqa dıspanserlik esepte turǵan naýqastarǵa dári-dármek ákeledi. Sondaı-aq, DamuMed qosymshasy arqyly onlaın-keńester ótkizedi. Dárigerlerdiń aıtýynsha, karantın engizilgennen keıin jaǵdaı turaqtalǵan.
«Búgingi tańda bizde alty mobıldi top jumys isteıdi. Karantın engizilgennen keıin shaqyrtýlar sany 30% tómendedi», – deıdi maman.
Esterińizge sala keteıik, maýsym aıynda Densaýlyq saqtaý mınıstrliginiń qaýlysymen koronavırýs pen pnevmonııa juqtyrǵan naýqastarǵa kómek kórsetý úshin mobıldi toptar quryldy. Búginde elordada 200-ge jýyq mobıldi top jumys isteıdi. Bir mobıldi top qyzmeti bes myń turǵynǵa eseptelgen. Shilde aıynyń basynan bastap Nur-Sultan jedel járdem stantsııasyna qońyraýlar sany úsh ese azaıdy – kúnine 3000-nan 1100-ge deıin. Onyń ishinde koronavırýs ınfektsııasy boıynsha – táýligine 500-den 89-ǵa deıin. Nur-Sultanda koronavırýs ınfektsııasynan emdelip shyqqandar sany 70% – 10 320 naýqastyń 7 260-y saýyǵyp shyqqan. Tósek-oryn qoryna júkteme 99%-dan 38%-ǵa deıin tómendedi. 5 shildeden bastap júrgizilgen karantın sharalary men ambýlatorııalyq emdeýdi kúsheıtý nátıjesinde pnevmonııamen aýrýhanaǵa túskender sany eki ese – 1348-den 633 adamǵa deıin azaıdy.