Nur-Sultanda karantın kezinde túngi klýbta 500-ge jýyq adam otyrǵan
NUR-SULTAN. QazAqparat – Elordalyq polıtsııa qyzmeti karantın rejımin buzǵan meıramhanalar men túngi klýbtardy anyqtady, dep habarlaıdy QazAqparat tilshisi.
«Karantın rejımin buzǵandardy anyqtaý boıynsha tekserý sharalaryn júrgizý barysynda mobıldi top saǵat 23.37-de «BHB» túngi klýbyn anyqtady. Polıtseıler kelgende mekemede 500-ge jýyq adam bolǵan. Klıentter men qyzmetkerler nazardan tys qalý úshin ǵımaratty ishten jaýyp alǵan jáne klýbta eshkim maska taqpaǵan, áleýmettik qashyqtyqty saqtamaǵan», - dep habarlady qalalyq Polıtsııa departamentiniń baspasóz qyzmeti.
Taǵy bir quqyqbuzýshylyq saǵat 22.10-da Qorǵaljyn tas joly boıyndaǵy «ZIMA» túngi klýbyn tekserý kezinde anyqtaldy. Bul mekemede 80 adam bolǵan.
Sondaı-aq, «ZOLOTO» meıramhanasyn, «ICON» klýbyn jáne «Korean hoıѕe» meıramhanasyn tekserý kezinde karantın talaptaryn buzý faktileri anyqtaldy.
«Atalǵan elıtalyq mekemeler Nur-Sultan qalasynda qoǵamdyq tamaqtaný nysandary jumysyn shekteý jáne karantın sharalaryn qatańdatý qaýlysyn, jumys jáne demalys kúnderi saǵat 9:00-den 22:00-ge deıingi jumys kestesi men sanıtarııalyq-profılaktıkalyq sharalardy anyq buzǵan. Mekeme ıelerine qatysty jınalǵan materıal Taýarlar men qyzmetterdiń sapasy men qaýipsizdigin baqylaý basqarmasyna jiberildi», - deıdi departament ókilderi.
Mobıldi top bir táýlikte 313 kásipkerlik nysanyn tekserip, 46 karantın rejımin buzý faktisin anyqtady.
«Nur-Sultan qalasynyń Polıtsııa departamenti azamattar men mekeme ıelerine karantın rejımi jalǵasyp jatqanyn jáne bas sanıtarlyq dáriger qaýlysyndaǵy talaptardy saqtaý kerektigin eskertedi. Tártip buzýshylar qoldanystaǵy zańnamaǵa sáıkes jaýapqa tartylady», - dep eskertti polıtsııa departamentinen.
