Nur-Sultanda, Qaraǵandy men Aqmola oblystarynda gaz taratý jelileriniń qurylysy jalǵasýda

NUR-SULTAN. QazAqparat – Astanada jáne Qazaqstannyń eki óńirinde alǵash ret taýarlyq gazǵa shekti kóterme saýda baǵasy bekitildi. Bul týraly QR Energetıka mınıstri Nurlan Noǵaev halyq aldynda esep berý kezdesýinde aıtty, dep habarlaıdy QazAqparat tilshisi.

«Saryarqa» magıstraldyq gaz qubyry qurylysynyń arqasynda Nur-Sultan qalasy, Aqmola jáne Qaraǵandy oblystarynyń turǵyndary kógildir otyndy paıdalanýǵa múmkindik aldy. Qyzylorda oblysynan bastalatyn «Saryarqa» gaz qubyry elimizdiń astanasyn, ortalyq jáne soltústik óńirlerdi kógildir otynmen qamtamasyz etýge múmkindik beredi», - deıdi QR Energetıka mınıstri Nurlan Noǵaev.

Onyń aıtýynsha, Nur-Sultan qalasynyń, Aqmola jáne Qaraǵandy oblystarynyń tutynýshylary úshin QR Energetıka mınıstrligi shekti kóterme baǵany 1000 tekshe metr úshin QQS-syz 24 537 teńge mólsherinde bekitti.

«Taýarlyq gazǵa shekti kóterme baǵany QR Energetıka mınıstrligi QR Ulttyq ekonomıka mınıstrligimen kelisý arqyly ulttyq operatordyń taýarlyq gazdy satyp alýǵa jáne taýarlyq gazdy tasymaldaýǵa ketken shyǵyndaryn, óńirlerdi gazben qamtýdyń ekonomıkalyq jáne áleýmettik jaǵdaılaryn eskere otyryp, bekitedi. Qazirgi ýaqytta magıstraldyq gaz qubyryna qosý úshin jergilikti atqarýshy organdar, ıaǵnı Nur-Sultan qalasy, Qaraǵandy jáne Aqmola oblystarynyń ákimdikteri gazdy odan ári halyqqa berý úshin gaz taratý jelileriniń qurylysy boıynsha jumystar júrgizýde», - dep atap ótti Nurlan Noǵaev.