Nur-Sultanda qansha dáriger syıaqy aldy
NUR-SULTAN. QazAqparat - Elordada 1469 medıtsına qyzmetkeri syıaqy aldy. Bul týraly Ortalyq kommýnıkatsııalar qyzmetindegi brıfıngte Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova aıtty, dep habarlaıdy QazAqparat tilshisi.
«Prezıdenttiń tapsyrmasyna sáıkes, barlyq 1 469 medıtsına qyzmetkerine, onyń ishinde koronavırýspen kúreske jumyldyrylǵan 163 dárigerge, 683 medıtsına qyzmetkerine, 623 kishi medıtsına qyzmetkerine syıaqy tólendi. Syıaqy tóleýge 150 mln teńge jumsaldy. Sonymen qatar, Elbasy tapsyrmasy boıynsha «Birgemiz» qorynan koronavırýs indetimen aýyrǵan patsıenttermen tikeleı qarym-qatynasta bolǵan medıtsına qyzmetlerin yntalandyrý úshin qosymsha 25 mln teńge bólindi»,- deıdi Sáýle Qısyqova.
Sondaı-aq ol medıtsına qyzmetkerlerin koronavırýs indetinen qorǵaý úshin qandaı jumystar júrgzilip jatqanyn aıtty.
«Koronavırýs indeti anyqtalǵan patsıentterdi emdeýge jumyldyrylǵan emdeý mekemelerindegi medıtsına qyzmetkerleriniń arasynda vırýs juqtyrmaý, sondaı-aq salaýatty moraldyq-psıhologııalyq ahýaldy ustap turý úshin shamamen 700 medıtsına qyzmetkeri qalanyń qonaq úılerine ornalastyryldy. Olar úsh mezgil tamaqpen qamtamasyz etilgen. Sonymen qatar olardy alyp júrý úshin kólik bólingen. Patsıenttermen jáne dárigerlermen jumys isteý úshin psıhologtar jumyldyrylǵan», - dedi basqarma basshysy.
