Nur-Sultanda qandaı jaǵdaıda karantın talaptary kúsheıtiledi
NUR-SULTAN. QazAqparat – Nur-Sultan qalasynyń bas memlekettik sanıtar dárigeri Sarhat Beısenova qandaı jaǵdaıda karantın talaptary kúsheıtiletinin túsindirdi, dep habarlaıdy QazAqparat tilshisi.
«Karantındi kúsheıtý máselesi qaladaǵy jaǵdaı nasharlasa qarastyrylady, qazir bizde turaqty túrde KVI-men aýyrýdyń joǵary kórsetkishi bar, biraq nasharlaý, ýshyǵý joq. Eger jaǵdaı nasharlasa, árıne ekonomıkalyq nysandardaǵy belgili bir shekteý is-sharalaryn qatańdatý jóninde qaýly shyǵarý qaralatyn bolady. Bul másele qaladaǵy epıdemıologııalyq ahýal nasharlaǵan kezde ǵana qaralady», - dep jaýap berdi S. Beısenova elorda ákimdiginde ótken onlaın brıfıngte.
Buǵan deıin Nur-Sultan qalasy qoǵamdyq densaýlyq saqtaý basqarmasynyń basshysy Tımýr Muratov elordadaǵy epıdemıologııalyq jaǵdaıdy shilde aıyndaǵy aýyr kezeńge teńegen edi.
Koronavırýs ınfektsııasy naýqastarynyń ósimi Naýryz meıramynan keıin baıqaldy. Astanalyq dárigerler men barlyq medıtsınalyq qyzmetkerler qaıtadan eki ese júktemede jumys istep jatyr.
KVI-men kúresý úshin 11 statsıonar uıymdastyryldy, onyń ishinde 10 ınfektsııalyq, bir karantındik statsıonar («Ramada Plaza» qonaq úıi bazasynda) bar. Qosymsha úsh uıymnyń bazasynda 300 ınfektsııalyq tósek-oryn ashylýy múmkin.
