Nur-Sultanda Kamıl Mýllashevtiń jeke kórmesi ashyldy
NUR-SULTAN. QazAqparat – Elordada Qazaqstan men Reseıge tanymal sýretshi Kamıl Mýllashevtyń jeke kórmesi ashyldy, dep habarlaıdy QazAqparat tilshisi.
Sýretshi Kamıl Mýllashev 1970 jyldary tanyla bastady. 1978 jyly adamnyń ǵarysh keńistigine shyǵýy jáne tyń jerlerdi ıgerýin «Jer jáne Ýaqyt. Qazaqstan» trıptıhynda beıneledi. Tretıakov galereıasy bul jumysty birden óz kollektsııasyna engizdi.
«Bul kórmege Qazaqstanda ótkizgen 50 jyl shyǵarmashylyq ómirimde salynǵan 130 kartına qoıyldy. Bul meniń ǵana tarıhym emes, Qazaqstannyń da tarıhy. Týyndylardy qazaqtyń rýhanı qundylyǵy dep aıtýǵa bolady. Men óz dáýirimdi, keńestik kezeńdi jáne eń mańyzdy tarıhı ýaqyt – Qazaqstannyń táýelsizdik jyldaryn kórsetkim keldi. Óz zamanymdaǵy ómir mánin kórsetkim keldi. Tarıhı keıipkerler men qoǵam qaıratkerlerin saldym. Meniń týyndylarymnyń basty taqyryby osy. Sondyqtan da, halyq meniń shyǵarmalarymdy jyly qabyldap, túsine aldy. Ásirese, «Náziktik aýrasy» atty týyndymnyń kóshirmeleri kóp úıde saqtaýly. Men áli de jumys isteımin, oıǵa alǵan josparlarym bar. Odan bólek, jastarǵa sabaq berip júrmin», - dedi sýretshi kórmeniń ashylý saltanatynda.
Kórmeniń ashylýyna qoǵam qaıratkerleri, tatar, bashqurt birlestikteriniń ókilderi jáne stýdentter keldi. QR Mádenıet jáne sport mınıstri Aqtoty Raıymqulova men Nur-Sultan qalasy ákiminiń orynbasary Baqtııar Mákenniń quttyqtaý hattary oqyldy.
Kamıl Mýllashev 1944 jyly Qytaı Halyq Respýblıkasynyń Úrimshi qalasynda dúnıege kelgen. 1963 jyldan beri Qazaqstanǵa qonys aýdarǵan. 1967 jyly N. V. Gogol atyndaǵy Almaty kórkemsýret ýchılışesin, 1978 jyly – Sýrıkov atyndaǵy máskeý memlekettik kórkemsýret ınstıtýtyn bitirgen. Qazirgi ýaqytta Kamıl Mýllashev – Qazaqstan Respýblıkasynyń eńbek sińirgen qaıratkeri jáne Tatarstannyń Halyq sýretshisi, Qazaqstan men Tatarstannyń memlekettik syılyǵynyń laýreaty, Reseı kórkemóner Akademııasynyń Qurmetti akademıgi, Chao-Jao qalasyndaǵy Han-Shan pedagogıkalyq ınstıtýtynyń jáne Shan-Tao ýnıversıtetiniń qurmetti professory, «Astana» halyqaralyq ýnıversıtetiniń professory.
