Nur-Sultanda «KamAZ» kóligi jolaýshylar avtobýsyn soqty

NUR-SULTAN. QazAqparat – Elordada «KamAZ» avtokóligi 30 jolaýshysy bar marshrýttyq avtobýsty soqty, dep habarlaıdy QazAqparat qalalyq Polıtsııa departamentine silteme jasap.

«18 aqpan kúni tańǵy saǵat 08.30-da R. Qoshqarbaev kóshesi men Abylaıhan dańǵylynyń qıylysynda «KamAZ» avtokóliginiń 54 jastaǵy júrgizýshisi rýldi basqara almaı, №22 marshrýttyq avtobýsqa soǵysty. R. Qoshqarbaev kóshesi arqyly Sh. Qudaıberdiuly kóshesine bara jatqan avtobýs qatty soqqydan qarsy jolaqqa shyǵyp ketip, Tólebaev kóshesine bara jatqan Skoda Rapid kóligimen soqtyǵysqan», - dep habarlady departamenttiń baspasóz qyzmeti.

Apat saldarynan «Skoda Rapid» kóliginiń 63 jastaǵy jolaýshysy qalalyq aýrýhanaǵa jetkizildi. № 22 avtobýsta shamamen 30 jolaýshy boldy. Olardyń eshqaısysy zardap shekken joq.

«KamAZ» júrgizýshisine qatysty QR ÁQBK 610-babyna sáıkes, ákimshilik hattama toltyryldy. Tekserý jumystary júrip jatyr.