Nur-Sultanda iz-túzsiz ketken eki jasóspirim Shymkentten tabyldy
NUR-SULTAN. QazAqparat – Astanada iz-túzsiz ketken eki jasóspirim Shymkentten tabyldy, dep habarlaıdy QazAqparat qalalyq polıtsııa departamentine silteme jasap.
Polıtsııaǵa 12 jasar uly men 13 jasar jıenin izdeýge kómek surap qala turǵyny habarlasqan. 30 qazan saǵat 15.00 shamasynda eki bala Amanat kóshesindegi úıden shyǵyp ketken. Osy ýaqytqa deıin olardyń qaıda ekeni belgisiz. Ózderimen birge 20 myń teńge kóleminde aqsha bolǵan.
Atalǵan fakti boıynsha is qozǵaldy. Kámeletke tolmaǵan balalardyń qaıda ekenin anyqtaý maqsatynda izdeý jáne tekserý sharalary jasaldy.
Polıtseıler beınebaqylaý kameralaryn qarap shyǵyp, olardyń qaıda ketýi múmkin ekeni pysyqtady. Ekeýin sońǵy ret kórgen aýmaqtaǵy úıler, podezder men jertóle, shatyrlar, aýlalar, dúkender men káriz qudyqtary qaraldy.
Іzdeý barysynda ata-anadan aqparat kelip tústi. Olardyń aıtýynsha, balalary Túrkistan oblysyndaǵy ájesine ketip qalýy múmkin. Sebebi 30 qazan kúni tańerteń nemeresi ájesine qońyraý shalyp, ony saǵynǵanyn aıtqan.
Shanhaı aýdanynda ıývenaldy polıtsııa qyzmetkerleri Nur-Sultannan Shymkentke baratyn jolaýshylardy jınaıtyn áıeldi tapty. Ol eki balanyń avtobýsqa otyrǵanyn aıtqan. Balalardyń Shymkentke aman-esen jetip, olardy ájesi kútip alǵany anyqtaldy.
Balalardy eresektersiz avtobýsqa otyrǵyzǵan júrgizýshige qatysty ákimshilik sıpattaǵy sharalar qabyldanady.
Nur-Sultan qalasynyń polıtsııa departamenti kúzgi demalys kezinde ata-analarǵa kámeletken tolmaǵan balalaryn qaraýsyz qaldyrmaýdy eskertedi.
