Nur-Sultanda ıttiń arqasynda 21 jastaǵy boıjetken aman qaldy

NUR-SULTAN. QazAqparat – Polıtsııaǵa elorda turǵyny habarlasyp, boıjetkenniń sýǵa sekirip ketkenin aıtqan, dep habarlaıdy QazAqparat Nur-Sultan qalalyq PD baspasóz qyzmetine silteme jasap.

Oqıǵa ornyna patrýldik polıtsııa jiberilgen.

Belgili bolǵandaı, tańǵy saǵat 11:00 shamasynda áıel Fıalka atty ıtimen birge Eýrazııa ýnıversıtetine qarama-qarsy Pýshkın kóshesiniń boıymen serýendep júrgen.

Bir kezde onyń ıti mazasyzdyq tanytyp, áıeldi julqylaı bastaǵan. Áıel ıti shaqyrǵan jaqqa barǵan kezde boıjetkenniń ózenge sekirip ketkenin kórgen.

Qýanyshqa oraı, osy mańdy Nur-Sultan qalalyq PD Ákimshilik polıtsııa basqarmasy jol-tehnıkalyq ınspektsııasynyń ınspektory, polıtsııa maıory Qanat Ábdiqalyqov tekserýge kelgen.

Ol jerde jol belgilerin ornatý jumystary júrip jatqan. Abyrjyǵan áıel oǵan kómek surap barǵan.

«Polıtseıler JShS jumysshylarymen birge oqıǵa ornyna júgirip barǵan. Osy kezde boıjetken qımylsyz etpetimen sýda jatqan. Er adam muzdaı sýǵa súńgip, qyzdy alyp shyqty. Jaǵalaýda polıtsııa qyzmetkerleri oǵan alǵashqy medıtsınalyq kómek kórsetti. Boıjetken esin jıyp, jedel járdemmen ketti», - delingen habarlamada.

Polıtseıler 21 jastaǵy boıjetenniń nelikten bul áreketken barǵanyn anyqtap jatyr.

Nur-Sultan qalalyq polıtsııa departamenti beıjaı qaramaıtyn qala turǵyndaryna alǵysyn bildiredi.