Nur-Sultanda Instagram arqyly «kosmetıka satqan» alaıaq áıel ustaldy
NUR-SULTAN. QazAqparat - 19 jastaǵy elordalyq boıjetken kosmetıka satatyn bolyp, Instagram áleýmettik jelisinde jalǵan akkaýnt ashyp, adamdardy aldap kelgen, dep habarlaıdy QazAqparat tilshisi elordalyq Polıtsııa departamentiniń baspasóz qyzmetine silteme jasap.
Jalǵan akkaýntta kosmetıkanyń túr-túriniń jarqyraǵan sýretteri men jeńildikter týraly aqparatty jarııalaý arqyly boıjetken kıvı-ámııan arqyly aldymen aqsha tóleýdi talap etip otyrǵan.
Alaıaqtyń bul qýlyǵyna 25 jastaǵy Nur-Sultan qalasynyń boıjetkeni ilinip, 250 myń teńgesin aıyrylyp qalyp otyr. Qazirgi ýaqytta QR Qylmystyq kodeksiniń 190-baby (alaıaqtyq) boıynsha sotqa deıingi tergeý amaldary júrgizilýde.
Jeńildikter men arzan baǵalar jazylatyn akkaýnttar ınternette qoldanýshylardyń nazaryn ózine birden aýdarady. Kóp jaǵdaıda adamdar taýaryn almaı jatyp, aldyn ala aqshasyn tólep qoıady.
Alaıaqtardy myna belgiler arqyly tanýǵa bolady:
- satýshynyń telefony men mekenjaıynyń jazylmaýy;
- satýshy kóbinese tek jazysyp baılanys ustap otyrýdy jón kóredi;
- taýardyń baǵasy uqsas taýarlardan qaraǵanda tym arzan keledi.
Nur-Sultan qalasynyń tártip saqshylary saqtanýdyń qarapaıym sharalaryn ustanýǵa shaqyrady:
- taýardyń baryna kóz jetkizip alý;
- satýshymen saýda barysyn vıdeobaılanys arqyly talqylaý;
- taýardy alǵannan keıin ǵana aqshasyn berý.
Internettegi alaıaqtardyń arbaýyna túsip qalsańyz, polıtsııanyń 71-67-10, 71-66-10, 71-65-58 nemese 102 nómirine habarlasýǵa bolady.
