Nur-Sultanda ıisshil ıt joǵalǵan 2 jasar búldirshindi tapty
NUR-SULTAN. QazAqparat – Felıks atty ıti bar kınolog Mámbetov kóshesiniń boıyndaǵy Oqýshylar saraıynyń mańaıynda 2 jasar balany izdep tapty, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.
Saǵat 21:10 shamasynda balalar attraktsıonynyń janynda ıti bar polıtsııa qyzmetkerine jas áıel júgirip kelip, kishkentaı ulyn joǵaltyp alǵanyn aıtqan.
20 mınýt boıy áıel balany óz betinshe izdegen, alaıda odan nátıje bolmaǵan.
Áıeldiń qolynda balanyń oıynshyǵy boldy, sonyń ıisimen Felıks balanyń izine tústi.
10 mınýttan keıin tóbet izdeý ornynan 300 metr qashyqtyqtan balany taýyp aldy.
Balasymen qaýyshqan ana polıtseılerge alǵys aıtty.
Polıtsııanyń aıtýynsha, 2 jasar Felıks qyzmetin jaqynda bastaǵan.
Bul - onyń birinshi sátti isi. Iisshil tóbet jaqsy jattyqqan, kınologtyń nusqaýlaryn shıraq oryndaıdy.
